O Trofeo Príncipe de Asturias de piragüismo recae no Club de Mar Ría de Aldán Hermanos Galdón

Saída da proba K4 masculino

O Club de Mar Ría de Aldán Hermanos Galdón proclamouse gañador do Trofeo Príncipe de Asturias de piragüismo que se disputou en Verducido. O segundo lugar foi para a Escola de de Piragüismo Cidade de Pontevedra e o terceiro para As Torres Romaría Viquinga. Vilaboa e Kaiak Tudense ocuparon as seguintes posicións na puntuación. Na competición participaron 27 clubs e douscentos padexeiros das categorías sénior, xuvenís e cadetes, tanto na modalidade de canoa como na de kaiak.

O Vilaboa dominou na modalidade de kaiak masculino. As súas dúas embarcacións ocuparon os primeiros lugares. A composta por Antonio Palmas, Brais Sánchez, Diego Castro e Alberto Conde foi a primeira en chegar á meta. A segunda estivo formada por David Branco, Marco Antonio Cadeas, Mauro Pazos e Rubén Pazos. A terceira posición foi para o Kaiak Tudense.

Precisamente o equipo de Tui foi o gañador na categoría feminina. Leticia Piña, Valeria Romeu, Andrea Fátima Porteiro e Carla Pérez impuxeron a súa fortaleza ante o Club de Mar Ría de Aldán, que terminou segundo e o Breogán do Grove, que foi terceiro.

E o Breogán foi o que se impuxo na canoa. Diego Romeu, Francisco Rodríguez, Ton Campos e Miguel Fernández gañaron con autoridade. O Kaiak Tudense, con Daniel Costa, David Costa, David González e Luís Figueira foron os segundos. O Poio Conservas Pescamar clasificouse en terceiro lugar. As regatas do Príncipe de Asturias disputáronse sobre un percorrido de 6.000 metros, con tres porteos.