O Sergas dará cobertura aos 64 menores rusos do programa de acollida polo que pasarán o verán en Galicia

A conselleira de Sanidade, Rocío Mosquera, entregoulle ao presidente de Ledicia Cativa, Juan Conde Novoa, os documentos acreditativos que garanten a cobertura asistencial durante o período vacacional dun total de 64 menores rusos que se desprazan a Galicia dentro do programa de acollida organizado pola Asociación Ledicia Cativa. No acto estivo presente, así mesmo, o secretario xeral técnico da Consellería de Sanidade, Antonio Fernández-Campa.

No que atinxe ás prestacións sanitarias, a colaboración establecida entre o Sergas e Ledicia Cativa inclúe a Atención Primaria, a Atención Especializada, e as prestacións farmacéuticas.

Na Atención Primaria enmárcanse a atención sanitaria nas consultas, servizos e centros de saúde; a indicación ou prescrición e a realización de probas e medios diagnósticos; as actividades programadas en materia sanitaria como a vacinación, exames de saúde e outras medidas de prevención, promoción e rehabilitación; e, ademais, programas de atención á infancia e a urxencias.

Na Atención Especializada están incluídas a asistencia ambulatoria especializada en consultas, que pode abarcar os procedementos cirúrxicos menores; a asistencia ambulatoria especializada no hospital de día, que abrangue a asistencia médica, a cirúrxica, a obstétrica e a pediátrica para procesos agudos, a reagudización de procesos crónicos ou a realización de tratamentos de procedementos diagnósticos que así o aconsellen; ademais da asistencia especializada en réxime de hospitalización.

Respecto da prestación farmacéutica, a colaboración establecida inclúe a dispensación prestada en réxime de internamento e a prescrita en réxime extrahospitalario.