O Rio Natura Monbus incorpora ao xogador Fran Cárdenas

O Rio Natura Monbus chegou a un acordo co xogador Fran Cárdenas para a súa incorporación ao equipo para a tempada 2014/15. Esta base de 1,77 metros e 23 anos procede da LEB Ouro, onde brillou coa Unión Financeira Baloncesto Oviedo e conseguiu uns números de 9.9 puntos (57% en tiros de dous, 44% en triplos e 81% en libres) e 4.4 asistencias para 12.7 de valoración durante a pasada campaña, alcanzando as semifinais do Playoff da competición.

Nacido en La Palma del Condado (Huelva) e formado na canteira do Cajasol, tamén pasou pola liga EBA (Écija Cajasol) e LEB Prata (Qalat Cajasol e Ourense) antes de recalar no conxunto asturiano.

“Fran foi un dos mellores directores de xogo da pasada edición da LEB Ouro. Responde perfectamente ao perfil deportivo que require o noso equipo para esa posición tan importante e tamén ao perfil humano necesario para o rol de terceiro base. Todo o que foi conseguindo na súa carreira gañouno con suor e demostrounos que vén con moita ilusión a axudar ao equipo a ser mellor cada día”, afirma o director xeral do club, José Luís Mateo.