O NH Obradoiro de Santiago converterase de novo en sala de exposición coa Feira de Arte Cuarto Público

Presentación da Feira de Arte Cuarto Público

Os cuartos do hotel NH Obradoiro de Santiago volverán converterse, por segundo ano, en salas de exposición grazas á II Feira de Arte Contemporánea Cuarto Público, que favorecerá un “punto de encontro” entre os creadores e o público en xeral.

O evento, organizado por Territorio Cultura en colaboración con NH Hoteis, terá lugar os días 28, 29 e 30 de novembro e porá a disposición dos artistas que se presenten á convocatoria -os traballos da cal serán avaliados por un xurado profesional- 25 cuartos do hotel, nos que poderán intervir co seu proxecto artístico.

A idea, segundo indicou unha das súas organizadoras, Patricia Amil, é favorecer o encontro entre a arte contemporáneo e o público, intentando que da feira saian “experiencias, propostas e mercado”.

Tras a boa experiencia da primeira cita, o ano pasado, o colectivo continua apostando polo formato de feira dentro dun hotel que, segundo a súa experiencia, favorece a participación do público ao tempo que combina “o íntimo e o público”, destacou Patricia Amil.

Outra das súas organizadoras, Xulia Santiso, explicou que este ano a feira presenta “novidades”, entre as que se atopan intervencións en distintos puntos da cidade e un horario “máis amplo”, así como mesas redondas “con máis contido” que non interferirán na propia feira.

PREMIOS

Ademais dos 25 cuartos para artistas, a feira organiza este ano uns premios que porán a disposición doutros tres artistas ou colectivos senllos cuartos nos que poderán intervir. Así, os interesados en optar a estes premios deberán presentar o seu proxecto ao xurado, que decidirá os tres gañadores que montarán o seu traballo nos tres cuartos adicionais.

Así mesmo, apuntou Paula Cabaleiro, tamén organizadora, existirá unha modalidade de participación a través dunha plataforma que exercerá como “mediador de vendas” para aqueles artistas que non teñan contratos con galerías nin representante. Como o pasado ano, a feira contará tamén cun premio de fotografía.

A convocatoria para participar nesta feira estará aberta ata o día 1 de outubro, mentres que o concurso de fotografía recibirá propostas ata o 6 de decembro.

COLABORACIÓN PÚBLICO-PRIVADA

O secretario xeral de Cultura, Anxo Lorenzo, participou na presentación este xoves da feira ‘Cuarto Público’, onde destacou os beneficios deste tipo de proxectos, de “intensa colaboración coa iniciativa privada”.

Tras destacar a súa “singularidade”, Anxo Lorenzo apostou por continuar co apoio a este tipo de citas que achegan a arte contemporánea ao público e achegan “muchísimos elementos interesantes” adicionais.