O letrado do maquinista considera que a comisión de investigación carece de credibilidade ao seguir directrices de Fomento

O avogado do maquinista F.J.G., imputado polo accidente do Alvia en Santiago que o pasado 24 de xullo ocasionou 79 mortes e máis dun centenar de feridos, asegura que a comisión de investigación de accidentes ferroviarios (CIAF) “non ten credibilidade ningunha” ao seguir “directrices” do Ministerio de Fomento.

En declaracións, Manuel Prieto afirma que as conclusións emitidas por este organismo -que ve na velocidade inadecuada e un despiste do maquinista as causas do accidente- non lle sorprenderon “nada”, pois é “o que esperaba” a ter “en conta que Renfe e Adif xa o dixeran e o terceiro apéndice de Fomento -pola CIAF- ía dicir o mesmo”.

Esta comisión, dependente do ministerio que dirixe Ana Pastor, “tiña que ser unha axencia independente”, segundo sinala Prieto, que censura que “España está a incumprir os mandatos europeos” neste ámbito, pois a CIAF, ao seu xuízo, “se debe a Fomento”. De aí que non lle outorgue “credibilidade ningunha”. Renfe, Adif e ela, afirma, “seguen directrices de Fomento e mostran opinións “unánimes” ao respecto do descarrilamento de Angrois e as responsabilidades que del se deben derivar.

Ademais, a defensa do maquinista avanza que existe no informe da CIAF unha cuestión que terá que estudar nas próximas xornadas, en relación coas recomendacións que inclúe, ao apuntar a comisión que a zona na que se produciu o accidente “se”tería que sinalizar e balizado”. “Aí está a base da imputación do Adif”, subliña, en alusión á “falta de medidas de seguridade que paliasen os posibles erros humanos”. Iso, insiste, “xa o tiña que instalar o Adif”.

SISTEMA ERTMS

En canto ás valoracións que a comisión dependente de Fomento fai sobre a implantación do sistema de control da velocidade ERTMS -o máis seguro, fronte ao Asfa-, Prieto recorda que “era obrigatorio ata a curva de A Grandeira e non se instalou” e neste punto sitúa o “primeiro incumprimento”.

A continuación, indica que, ao estar instalado ata o quilómetro 80, “non frea pero si avisa” porque o maquinista tería que apertar un botón de estar activo -o sistema desinstalarse a bordo do tren por problemas de compatibilidade- e “esa perda espacial de non saber” onde se atopaba, “inmediatamente” recobraríase, de acordo coa argumentación do letrado.

Neste sentido, fai fincapé en que o ERTMS, ademais, quitou por evitar atrasos” do trazado da liña Ourense-Santiago, xa que inicialmente estaba prevista a súa colocación ata a estación compostelana.