O IV Concurso de Pinchos de Primavera de Ourense xa vendeu máis de 6.000 pinchos

Rematou o Concurso de Pinchos de Primavera 2014, no que durante os quince días que van do 26 de maio ao 8 de xuño 44 locais da cidade ofertaron petiscos de diferente elaboracuión e factura, e o balanzo que fai a Concellería de Turismo, á vista do ambiente que se vivíu nas rúas durante este período, é máis que positivo: os hosteleiros están satisfeitos, os ourensáns puideron botarse á rúa e esta presentou un aspecto inmellorable. Este ano, ademais, co engadido de poder gozar cos mellores viños das D.O.s da nosa provincia acompañando os petiscos. 

No tocante aos números, foron máis de 2.000 as papeletas recollidas (o que garante un mínimo de 6.000 pinchos vendidos, xa que en cada papeleta caben tres) do total das máis de 15.000 entregadas. A cifra é inferior á do ano pasado, pero as expectativas dos hosteleiros cumpríronse con creces. Hainos que venderon máis de mil (1.000) pinchos durante o concurso, principalmente os emprazados na zona de Viños de Ourense. No estremo oposto, fóra desa zona de viños, os datos que proporcionan os hosteleiros falan de 300 pinchos servidos.

Cómpre engadir o seguemento realizado polo público a través das redes sociais da conta CapitalTermal, nomeadamente Facebook e Twitter, onde tamén serán publicados os gañadores dos numerosos premios que ofrecía o concurso.

Agradecer, do mesmo xeito, a implicación das firmas comerciais e empresas colaboradoras, que foron moitas e de calidade, e que estarán presentes na entrega de premios do concurso. Esta celebrarase nun acto na Confederación de Empresarios de Ourense (CEO) o vindeiro martes 17 a partir das 19:00 horas. No acto estarán presentes os preto de cen premiados nos diferentes sorteos do Concurso.