O goberno de Ferrol achega 35.000 euros aos programas de inclusión de Cáritas

O alcalde de Ferrol, José Manuel Rey Varela, asinou esta mañá un convenio de colaboración coa directora de Cáritas Diocesana de Mondoñedo-Ferrol, Josefina Rebés Torra, para a posta en marcha dun programa de mellora da inclusión social. Deste xeito, a Concellería de Benestar Social achega un total de 35.000 euros para o desenvolvemento dos proxectos “Tecendo redes. Intervención con familias en situacións de especial vulnerabilidade” e “Dentro-fora. Centro de día para persoas sen fogar”.

Este acordo de cooperación entre a Administración ferrolá e a entidade permitirá mellorar a inclusión social das persoas e grupos especialmente vulnerables fomentando a colaboración complementaria das organizacións de solidariedade na loita contra a exclusión social. O programa “Tecendo redes” consiste no servizo de acollida de Cáritas parroquiais, os gastos do mesmo (transporte de alimentos, etc…), axudas económicas para cubrir necesidades básicas, axudas de emerxencia a persoas/familias en risco de exclusión económica (pago de rendas, aboamento de subministros, gastos escolar, de medicamentos…), e coordinación con outros centros e servizos. Así mesmo, o proxecto “Dentro-fora” permitirá seguir co servizo de acollida no Centro de día para persoas sen fogar, actividades de ludoteca, axudas de emerxencia e servizos de almorzo e merendas.