O GAC3 organiza showcookings para poñer en valor os productos do mar da Costa da Morte
Os frutos do mar da Costa da Morte convértense en protagonistas das últimas fins de semana de xuño en seis municipios con litoral. O Grupo de Acción Costeira – GAC3 Costa da Morte programou un calendario de demostracións culinarias en vivo (showcookings) no marco da iniciativa turístico-gastronómica “Come o mar” denominadas “O espectáculo de cociñar o mar”. Durante estes obradoiros que cubrirán a ruta Vimianzo, Carballo, Cabana, Muxía, Ponteceso e A Laracha poñeranse en valor varios produtos da Costa da Morte como son o peixe en salgadura e fresco, o berberecho, a ameixa, o congro seco e o calamar ou o polbo, destacando as súas cualidades e presentándoos dunha forma innovadora e sorprendente no padal de veciños, turistas e visitantes. Aporta Comunicación é a empresa encargada de desenvolver este ciclo de actividades.
A creativa xornada inaugural, denominada “Conversas co mar dende a cociña”, tivo lugar esta tarde no auditorio de Forum Carballo. Foi unha clase maxistral impartida por dous cociñeiros con Estrela Michelín, o carballés Adrián Felípez e Javier Olleros, xerente do restaurante do Grove Culler de Pau; e unha profesora da Basque Culinary Center e blogueira gastronómica, Marta Fernández Guadaño.
Diante da cociña portátil que percorrerá o litoral da comarca, e tomando como fío conductor a presentación das receitas “Muxo, caldo das súas espiñas asadas”, “Esferificacións de berberecho da ría” e “Vexetais de litoral”, os tres levaron a cabo unha actividade de divulgación de boas prácticas, mellora competitiva e innovación no sector da hostalería. Pola súa parte, Fernández centrouse en explicar tendencias xa latentes e demandas futuras dos turistas e visitantes de xeito que os hostaleiros locais poidan ter unha visión de conxunto e preparse para futuras necesidades.