O filial e o xuvenil nacional do Santiago Futsal proclámanse subcampións de Copa en Pontevedra

Esta mañá disputáronse as dúas finais de Copa do Xuvenil Nacional e da Terceira División, na que estaban presentes os dous equipos do Santiago Futsal.

Os máis madrugadores foron os pupilos do Xuvenil Nacional que se enfrontaron na final ao Azkar Lugo, que se alzou coa Copa tras vencer por 4-3 nun partidazo entre dúas das mellores canteiras da comunidade. Os santiagueses lograron porse por diante aos 8 minutos nunha transición cun gol de Dani Quintela asistido por Anuar. Os lucenses, que durante a primeira metade foron a remolque, lograron empatar minutos despois, pero sería de novo Dani Quintela quen poría aos seus por diante tras un disparo sen perigo que se coou na portaría lucense. A un minuto do descanso, Azkar Lugo logrou empatar desde os 10 metros, pero Quique fixo un golazo adiantando de novo ao Santiago Futsal antes do descanso.

Tras a continuación e en apenas 20 segundos, Azkar Lugo logrou empatar e darlle a volta ao marcador póndose por diante por primeira vez en todo o partido. A insistencia dos santiagueses non tivo a súa recompensa e o marcador xa non se moveu, dándolle a vitoria e a Copa aos lucenses. Ademais, Iago Otero foi elixido mellor xogador da final.

Pola súa banda, o filial chegou á final tras imporse por 5-2 ao Burela B, enfrontándose aos anfitrións, o Leis Pontevedra, que en semifinais venceron 4-1 ao 5 Coruña. O partido foi un malgaste de intensidade no que durante os primeiros minutos ningún dos equipos chegou con perigo á portaría contraria. Os santiagueses foron tomando posesión, e aínda que as ocasións foron chegando para eles, foron os locais quen se puxeron por diante antes do descanso.

Na segunda parte, o dominio foi dos santiagueses que perdoaron numerosas ocasións sobre a portaría do Leis, que ampliou a súa vantaxe no marcador a escasos tres minutos para o final cando o Santiago Futsal B atacaba con porteiro-xogador para tratar de empatar o partido. Esta vantaxe de dous goles deu moita comodidade aos pontevedreses, que se alzaron coa Copa ante o seu público.