O Día do Deporte na Rúa da Coruña ofrecerá actividades de auga e na praia

Presentación do Día do Deporte na Rúa

O concelleiro de Educación, Deportes e Mocidade, Francisco Mourelo, presentou esta mañá o XXVII Día do Deporte na Rúa que se celebra o vindeiro domingo, 15 de xuño, de 11.00 a 14.00 horas, na contorna de Riazor (Parking do Palacio dos Deportes, Manuel Murguía, Paseo Marítimo e a praia). “Despois de 27 anos, este día do deporte con maiúsculas non é un máis. A recuperación dos Cantóns para o goce de todos os cidadáns ofreceunos a oportunidade de descubrir un novo espazo cheo de oportunidades e que nos vai a permitir, ademais, engadir a longo prazo lista de modalidades deportivas moitas que até agora non tiñan cabida pero que, con todo, si tiñan moita demanda”, explicou Mourelo.

Así, a iniciativa, que se bautizou como o Día do Deporte na Rúa… e na Praia, incluirá por primeira vez actividades de auga. “Este ano, todos os participantes non poderán esquecerse do bañador para poder gozar de actividades como un inchable para waterpolo, vea lixeira, surf, piragüismo ou remo. Ademais, o areal de Riazor tamén incluirá unha montaxe para a práctica do voleibol praia, futvoley, minitenis e rugby praia”, explicou o concelleiro, quen engadiu: “Haberá tamén un espazo para actividades dirixidas de zumba, combat, pilates e bailes latinos; e poderase gozar do spinnig no Paseo Marítimo con vistas á bahía, e contemplar exhibicións de ximnasia e artes marciais”.

En total, ofreceranse 40 actividades; incluíndo os deportes máis clásicos como fútbol, baloncesto, balonmán, voleibol e atletismo; e outros máis minoritarios en canto a número de persoas que o practican como o béisbol, o taichí ou a esgrima. “Outra novidade deste ano será o espazo de xadrez, que contará por primeira vez cun xadrez xigante. Ademais, terán cabida os deportes tradicionais como a chave e os dardos; e deportes adaptados como o tenis ou a esgrima en cadeira de rodas”, explicou Mourelo.

Como o ano pasado, fomentarase a participación nas actividades cun carné do deportista que os asistentes terán que ir selando a medida que vaian realizando as actividades. “O carné levará a palabra deporte que irán selando os monitores das diferentes estacións deportivas. Desta forma, cantas máis actividades próbense, maiores serán as posibilidades de optar a un premio. Así, cando se complete no carné a letra D, conseguirase a camiseta conmemorativa, e os mellores premios sortearanse entre aqueles que completen a palabra deporte. Para favorecer a participación en todas as estacións deportivas os deportes minoritarios valerán dous selos, os deportes de auga nos que haxa que mollarse valerán tres selos, e o resto uno”, destacou o concelleiro.

Francisco Mourelo agradeceu o apoio das 56 entidades colaboradoras entre federacións, clubs e empresas e explicou que unha das entidades participantes, Moteiros en Acción Solidaria, ademais de contar cun circuíto para gozar dun deporte de motor, realizará unha campaña solidaria de recollida de alimentos en favor do Banco de Alimentos.

“En definitiva, está todo preparado para a gran festa dos clubs, federacións, organismos e empresas, escolas deportivas, centros escolares e, como non, de todos os coruñeses; a festa do deporte. Un día para gozar en familia e cos amigos e que cumpre co noso principal obxectivo de achegar as distintas disciplinas deportivas á poboación e que todos coñezan a infinidade de alternativas deportivas que lles ofrece a cidade”, destacou Mourelo, quen concluíu: “O domingo esperamos a máis de 4.000 persoas, demostrando unha vez máis que a cidade é un exemplo de práctica deportiva. Así, este fin de semana péchase de forma simbólica a tempada de escolas deportivas municipais xa que o venres tamén se celebra a tradicional cea do deporte”.

DISPOSITIVO ESPECIAL DE TRÁFICO

Con motivo da celebración do Día do Deporte na Rúa, porase en marcha o seguinte dispositivo de tráfico:

De 06.00 a 15.00 horas o día 15, córtase ao tráfico o Paseo Marítimo na zona comprendida entre a Anteplaza (cruzamento con avenida da Habana) e o cruzamento de Manuel Murgía con Almirante Eulate, configurándose como alternativa a Manuel Murguía a avenida da Habana.

Do mesmo xeito, as alternativas nesa zona de afección ao traxecto paseo marítimo – Millenium, serán:

– En sentido Milennium: avenida da Habana, Paseo de Rolda, Manuel Murguía e Almirante Cadarso.
– En sentido Paseo Marítimo: Almirante Cadarso, Manuel Murguía, Paseo de Rolda e avenida da Habana.

En todo momento manterase operativa a saída do aparcadoiro subterráneo de Riazor – Orzán e garantirase o acceso á Igrexa das Escravas desde o Paseo de Rolda. Ademais, resultará afectada a liña 7 de autobús urbano, ofrecéndose como alternativa as paradas situadas na avenida da Habana para o 3 e o 3A. Informarase os usuarios con paneis informativos en todas as paradas de Manuel Murguía, e a través da web da Compañía de Tranvías (www.tranviascoruna.com), Facebook e Twitter.