O consello regulador da D.O. Rías Baixas cualifica como moi boa a anada 2013

Cata de viños da D.O. Rías Baixas en Santander

O Consello Regulador da Denominación de Orixe Rías Baixas presentou hoxe xoves ao sector profesional de Santander os viños correspondentes á Anada 2013, que recibiron a cualificación de “Moi Boa” polo pleno do Consello Regulador.Un acto que ten lugar durante todo o día (desde as 11,30 h ás 14 h, e desde as 18 h a 22 h) no Hotel Real e ao que confirmaron asistencia máis de 400 profesionais cántabros, que poderán degustar un total de 85 marcas da anada 2013, pertencentes a 54 adegas amparadas por esta denominación.

O presidente do Consello, Juan Gil de Araujo, e o secretario xeral, Ramón Huidobro, explicaron aos medios cántabros que a D.O. Rías Baixas é a máis grande de Galicia: conta con máis de 6.700 viticultores, unhas 180 adegas e unhas 4.064 hectáreas, repartidas en 23.000 parcelas, o cal mostra a atomización desta denominación. A vendima 2013 no D.O. Rías Baixas foi a segunda máis grande nos 26 anos de historia desta denominación con case 34 millóns de quilos de uva. Actualmente, o D.O. Rías Baixas destina aos mercados internacionais un 32% da súa produción.

Na actualidade, o Órgano de Control e Certificación da Denominación leva certificados o 56,2% da colleita de 2013, o que supón 7.791.691 litros de viños cualificados a 19 de maio deste ano. Ademais deste informe, que compara datos estatísticos de colleitas anteriores con valoracións de vendima, o Pleno do Consello Regulador tamén ten en conta outros factores como as puntuacións obtidas polos viños nos concursos nacionais e internacionais, guías, así como os comentarios dos expertos.

Santander convértese nun destino prioritario para esta denominaciónque acolle a presentación dos viños correspondentes á Anada 2013 cun túnel do viño que acolle a 85 marcas de Rías Baixas. “Esta é a primeira vez na historia deste Consello Regulador que se presenta unha anada de Rías Baixas neste mercado”, explicou o secretario xeral do Consello, Ramón Huidobro. Neste sentido, Juan Gil de Araujo admitiu que “Santander é un mercado estratéxico para esta denominación de orixe xa que supón 8,3% das vendas de viño da D.O. Rías Baixas, segundo a Consultora Nielsen que o sitúa na área 6, Norte-Centro xunto con Palencia, Navarra, Biscaia, Guipúzcoa, A Rioxa, Burgos e Álava”.

Cualificación “Moi Boa”

Unha das tarefas encomendadas ao Pleno do Consello Regulador consiste na valoración da colleita, o que comunmente se coñece como ‘cualificación da anada’. Dada a relevancia desta decisión, o Consello Regulador Rías Baixas encarga un informe técnico ao Órgano de Control e Certificación da Denominación, responsable da acreditación dos viños. Dentro das súas tarefas, este órgano é responsable de auditar os viños, depósito a depósito, antes de ser embotellados e comercializados. Para iso todos os viños da anada 2013 en Rías Baixas pasaron os seus respectivos controis analíticos, nun laboratorio acreditado, e organolépticos, realizados por un panel de cata constituído por máis de 45 expertos.

Segundo este informe técnico: “os viños da anada 2013 son viños algo máis pálidos que en anos anteriores, de intensidade aromática media, frescos, de alta tipicidad aromática e gustativa”.

Vendima e Plan Director

Con 33.743.486 millóns de quilos de uva vendimiada nas 4.064 hectáreas inscritas, a colleita 2013 foi a segunda maior na historia da Denominación de Orixe Rías Baixas, só superada pola de 2011 (cando case se alcanzaron os 42 millóns).

A finais de abril, o D.O. Rías Baixas daba a coñecer o seu segundo Plan Director, despois do presentado en 2002. Elaborado pola Escola de Negocios da Fundación Novacaixagalicia, este Plan conclúe que a aposta pola calidade e os procesos de internacionalización permitiron ao sector de Rías Baixas afrontar a crise con menos dificultades que a media e afrontar ao futuro con esperanza.

O futuro da Denominación para mellorar a súa importancia socioeconómica e a súa posición competitiva pasa por manter e mellorar a calidade dos viños de Rías Baixas. Tamén por buscar o equilibrio entre viticultores e adegas; por traballar a favor da sustentabilidade ambiental; por apostar polo I+D+i; por profundar na profesionalización do sector; e por cooperar no desenvolvemento de estruturas comerciais e de marcas para poder crecer nos mercados. Todo iso sen esquecer traballar polo mantemento do emprego e o crecemento nos mercados, así como na notoriedade da marca.