O Concello de Lugo replica que a contratación de camións de lixo compete a Tragsa

O concelleiro de Medio Ambiente do Concello de Lugo, Luís Álvarez, explicou que a contratación de camións para a recollida de lixo compete á empresa pública Tragsa, que desde o luns pola tarde se encarga, xunto a Urbaser, da retirada de residuos nos puntos de alerta sanitaria.

Esta foi a resposta do tamén portavoz do Goberno local á denuncia presentada esta madrugada polo comité de folga de Urbaser contra a actuación nas rúas lucenses de camións de Tragsa, das empresas Caravana e Hermanos Blanco Trigo, e tamén de vehículos dos municipios de Pol, A Pastoriza e Portomarín, segundo a CIG.

“Nós non temos constancia desa denuncia, en todo caso a contratación deses camións compete a Tragsa. Nós contratamos a Tragsa e ela busca os medios que entende oportunos”, resolveu Álvarez, quen sinalou que se se presentou a denuncia, estudarase”. “E defenderémonos”, apostilou.

En canto á recollida de lixo a pasada madrugada, asegurou que os traballas de Tragsa e Urbaser desenvolvéronse con “total normalidade”.