O Concello de Cedeira invita a nenos e maiores a participar no “Día da Bicicleta”

O Concello de Cedeira celebrará de novo este ano o “Día da Bicicleta”. Terá lugar o vindeiro domingo día 29 de xuño, e a Concellería de Deportes, promotora da iniciativa, quere invitar a todos os veciños e veciñas da localidade a participar na mesma, tal e como fixeron en edicións pasadas. A cita consistirá nun paseo en bicicleta polas rúas da vila, na que a competición será o menos importante. Trátase de disfrutar en conxunto de Cedeira e tamén deste medio de transporte tan respectuoso co medio ambiente. A Concellería de Deportes espera que o tempo acompañe e calcula que o percorrido, adaptado a todas as idades, dende nenos ata avós, dure en torno a unha hora.

Este tempo sen coches comezará e concluirá en pleno corazón da vila, no Parque do Sagrado Corazón. Dende o Concello infórmase de que previamente á saída, que se estima en torno ás 11,00 horas, procederáse á inscripción de todos os participantes. Precisamente, esa inscripción dará dereito a participar nun sorteo de detalles que levará a cabo o Concello nesa mesma praza. Así mesmo, o Concello lembra a obrigatoriedade de levar o casco para os menores de dezaoito anos.