O Concello da Coruña aforra un millón de euros no préstamo solicitado en 2012

O concelleiro de Economía e Facenda, Roberto Coira, informou esta mañá de que o Goberno municipal aprobará no pleno do próximo 9 de xuño unha redución do tipo de interese en 140 puntos básicos (1,4%) no plan de pago a provedores aprobado en 2012 e ao que se acolleu o Concello, por importe de 7 millóns de euros, para facer fronte ás facturas que os anteriores responsables locais deixaron pendentes de abonar. Este acordo suporá un aforro ás arcas coruñesas de 100.000 euros anuais, é dicir, un millón de euros á finalización do pago do crédito concedido polo Ministerio de Facenda e Administracións Públicas.

Roberto Coira sinalou que este acordo que leva ao pleno ordinario deste mes de xuño por mor da proposta presentada pola Federación Española de Municipios e Provincias (FEMP) para a modificación das condicións financeiras do plan de pago a provedores de 2012, unha proposta que foi aprobada na Comisión Nacional de Administración Local. Con esta decisión, o Concello reducirá o tipo de interese -que actualmente se atopa no 5,595%- en 140 puntos básicos, mantendo os actuais períodos de carencia (2 anos) e de amortización (10 anos).

“Esta medida permite alixeirar ao máximo posible a carga financeira derivada do préstamo de 7,05 millóns de euros para o pago a provedores. O aforro estimado coa aplicación desta decisión é de 100.000 euros anuais, o que suporá ao redor dun millón de euros á finalización do pago do préstamo”, destacou o responsable municipal da área de Economía e Facenda.

O concelleiro explicou que, do tres modalidades acordadas pola FEMP e o Ministerio de Facenda e Administracións Públicas para flexibilizar as condicións financeiras do pago a provedores, o Concello da Coruña acóllese á que lle permite reducir o tipo de interese do préstamo sen ampliar o período de amortización. “Optamos pola modalidade que máis favorece ás arcas municipais, pois tiñamos a posibilidade de ampliar o período de carencia e o período de amortización, pero a solvencia económica da facenda municipal permítenos manter os prazos de pago do préstamo, unha decisión que ten como recompensa o aforro dun millón de euros coa redución máxima do diferencial aplicable sobre o euribor a tres meses, o que significa unha rebaixa de 140 puntos básicos nos tipos de interese”, engadiu Coira.

O aforro dun millón de euros na amortización da débeda súmase ás políticas do actual equipo de goberno que favorecen a eliminación do gasto superfluo e a mellora da xestión dos servizos sociais, liñas básicas que permiten impulsar o plan de axuste e que se traduciron nun aforro de 744.411 euros no primeiro trimestre deste ano, o que suporá a finais de 2014, de manter esta tendencia, un aforro de 7,5 millóns desde que se empezou a aplicar o plan de axuste a mediados de 2012.

MELLORA DA ADMINISTRACIÓN

O concelleiro de Economía e Facenda lembrou que o Concello se acolleu en 2012 ao plan de axuste para facer fronte aos pagos a provedores de maneira inmediata, unha oportunidade única que permitiu porse ao día e deixar a cero a débeda municipal coas empresas:
“O plan de pago a provedores permitiu unha inxección de liquidez sen precedentes; un alivio ao sector empresarial, especialmente a autónomos e a pequenas e medianas empresas; e unha consolidación dos postos de traballo. A irresponsable xestión dos fondos públicos da anterior etapa municipal provocou inquietude e preocupación aos máis de 80 provedores que estaban pendentes de cobrar do Concello hai dous anos”.

Roberto Coira tamén informou de que, para reducir o tipo de interese en 1,4% e aforrarse un millón de euros no plan de pago a provedores, o Concello impulsará unha serie de medidas acordadas polo Goberno central e a FEMP que suporán un salto adiante no uso das novas tecnoloxías por parte da administración e que axilizarán a tramitación dos expedientes por parte dos emprendedores:

– Adhesión automática ao momento xeral de entrada de facturas electrónicas da Administración Xeral do Estado. Esta plataforma permitirá aos contratistas municipais a remisión das facturas electrónicas ao Concello.

– Adhesión automática á plataforma Emprende en 3 para impulsar e axilizar os trámites para o inicio da actividade empresarial.

– Proceder á substitución de polo menos o 30% das vixentes autorizacións e licenzas de inicio de actividade económica por declaracións responsables, unha medida que o Concello xa recolleu na ordenanza que aprobou de maneira inicial en maio para a intervención e control na execución de obras, implantación de instalacións e actividades ou servizos.