O comité de empresa de Urbaser reclama a readmisión tras ser despedidos

O portavoz do comité de empresa de Urbaser, empresa concesionaria do servizo da limpeza viaria na cidade de Lugo, Julio Pacio, reclamou este xoves a readmisión dos once membros do comité despedidos o mércores por incumprir os servizos mínimos segundo alegou a empresa.

Ademais, indicou que Urbaser notificou 66 sancións a outros tantos traballadores, dun persoal de 139 empregados no servizo de recollida de lixo en Lugo.

Pacio, que é un dos despedidos, subliñou que os representantes dos traballadores “sempre” estiveron “en disposición” de sentar “a negociar”. “E acudimos a todas as mesas a que fomos convocados, a pesar dos plantóns da empresa”, apostilou.

Agora, segundo anunciou, non volverán sentar “baixo ningún concepto ata que se retiren as sancións e se readmitan aos despedidos”.

Pacio manifestou que ten claro que Urbaser “está a facerlle a cama ao goberno socialista da cidade de Lugo, porque non é normal todo o que pasa”. “Non é normal que nos dean plantón na mesa de negociación dúas veces consecutivas”, sostivo.

UNHAS 700 TONELADAS ACUMULADAS

En tanto, a empresa pública Tragsa segue coa recollida de lixo nalgúns puntos, acompañados tamén de traballadores de Urbaser, que acoden a aquelas zonas onde se decretou a alerta sanitaria, que suman un centenar tras 17 días de folga.

Da orde de cen toneladas retiráronse das rúas, onde se acumulan unhas 700 nos colectores da cidade, segundo os cálculos apuntados polos traballadores.