O Club Columbófilo do Morrazo organiza o XVI Trofeo de Columbofilia en Cangas

O Club de Columbofilia do Morrazo organiza os vindeiros días 27 e 28 de xuño o XVI Trofeo de Columbofilia Concello de Cangas no que está previsto que participen ao redor de 400 pombas de preto de 100 columbófilos pertencentes a vinte clubs de toda Galicia. Mañá procederase ao encestado das aves que serán transportadas ata Lloret de Mar dende onde sairán na madrugada do venres chegando previsiblemente a primeira ao longo do sábado, percorrendo un total de 955 quilómetros, aínda que a competición seguirá aberta durante catro días, prazo máximo para que chegue a última sen ser descualificada. O evento é federado sendo a última proba galega para o Campionato de España de Gran Fondo así como para os Campionatos Galegos de Maratón e Seguridade en Largas Distancias. Dende a organización sinálase que o cartel deste ano foi elaborado pola artista canguesa Sabela Camiña Castro así como o feito que a comarca do Morrazo estará amplamente representada na proba con 30 pombas participantes. Ao finalizar haberá un único premio ao gañador absoluto.