O catador Josep Roca e o xornalista José Ribagorda decláranse admiradores do Polbo do Carballiño

José Ribagorda na presentación do Polbo do Carballiño

O catador Josep Roca, copropietario do restaurante o Celler de Can Roca e considerado o mellor restaurante do mundo, e o xornalista e recoñecido gastrónomo José Ribagorda, deleitáronse co Polbo a Feira do Carballliño, destacando os dous o intenso sabor e a amable textura deste prato, famoso no mundo enteiro, e do que a vila carballiñesa é a súa capital. Estes dous personaxes internacionais asistiron á entrega dos premios da DO Ribeiro, no mosteiro de San Clodio, onde Josep Roca recibiu o premio honorifico desta DO.

Na festa de entrega dos premios ofreceuse un coctel aos asistentes, con produtos das distintas denominacións galegas, e onde o polbo á feira foi a estrela, cun recuncho gastronómico propio no claustro do mosteiro, que foi visitado por todos os asistentes, e eloxiado ao mesmo tempo. Foi este un primeiro paso da presentación en sociedade da nova edición da Festa do Polbo, que este ano está dedicado aos galegos residentes en Cataluña, algo que chamou gratamente a atención ao catador Roca.

A edil de Turismo Pilar Caride foi a anfitrioa neste recuncho gastronómico, e aproveitou a presenza de xornalistas especializados en prensa culinaria e gastronómica para convidarlles a coñecer a festa, o segundo domingo de agosto e, como non, a probar o Polbo á Feira.