O Campus SRD Portuarios desenvolverase en dúas quendas no campo de fútbol de Aneiros

A concelleira de Deportes do Concello de Ferrol, Susana Martínez Galdós, presentou esta mañá a primeira edición do Campus SRD Portuarios que se celebrará en dúas quendas, a primeira terá lugar do 30 de xuño ao 5 de xullo, e a segunda será do 7 ao 12 de xullo. O evento deportivo está dirixido aos nenos e nenas nados entre os anos 1999 e 2008 – de 6 a 15 anos de idade- e se desenvolverá no campo de fútbol de Aneiros. A edil ferrolá estivo acompañada polo presidente do SRD Portuarios, Antonio Baliño Vázquez.

Neste campus desenvolveranse todas as técnicas do fútbol moderno tanto de ataque como de defensa, así como adestramentos específicos para porteiros. Martínez Galdós sinalou que o Campus SRD Portuarios “permite aprender disciplina deportiva e a conciliación da vida laboral durante o período vacacional dos pequenos”. A edil de Deportes tamén quixo felicitar ao SRD Portuarios “polo traballo que realiza con nenos e mozos ao longo de todo o ano”.

Pola súa banda, o presidente do SRD Portuarios, Antonio Baliño Vázquez, apuntou que “daba a franxa de idade tan amplia se realizan dous ou tres grupos por idades”. Baliño Vázquez explicou que os participantes recibirán agasallos e para favorecer a conciliación da vida laboral será posto en marcha un servizo de garda a partir das 8-8:30 horas. Esta primeira edición do campus desenvolverase de 9:30 a 14:00 horas e tamén contará coa visita de xogadores profesionais. As persoas interesadas en participar neste encontro deportivo deberán realizar a súa inscrición a través la páxina web: www.srdportuarios.es ao longo desta semana.