O BNG propón acabar coa herdanza do Franquismo abrindo un proceso constituínte cara a República

O voceiro nacional do BNG, Xavier Vence, reclamou este luns a apertura dun “proceso constituínte” tras a abdicación do Rei Juan Carlos e apostou por un modelo republicano para “acabar coa herdanza de Franquismo”.

Nunha comparecencia iniciada tras o discurso pronunciado polo monarca, Vence indicou que don Juan Carlos “foi nomeado por Franco como o seu sucesor” e apostou por aproveitar a conxuntura para “corrixir un erro histórico”. “É hora de rematar coa herdanza do franquismo”, sentenciou.

O Rei Juan Carlos, apuntou Vence, cede ao seu fillo “un trono impopular e corrupto” que “está lonxe de ser modélico”, polo que, apuntou o líder do BNG, a Coroa “atravesa unha crise institucional”.

Non obstante, o voceiro nacional do BNG criticou que pretenda solucionarse esta “crise” cun “lavado de cara institucional” para “desviar a atención dos grandes problemas do país”. “A actual crise social require un cambio máis profundo e máis amplo”, apuntou Vence, “non poden tapar o movemento cidadán que hoxe reivindica máis democracia que un cambio cosmético”.

NOVO PROCESO CONSTITUÍNTE

Ante esta situación, o BNG propuxo que se abra “un novo proceso constituínte” que derive “nunha profunda democratización das institucións” dentro “dun marco que só pode ser republicano”.

Ao mesmo tempo, Xavier Vence apostou por “limpar o control da oligarquía sobre o aparato do Estado” e por rematar “coa corrupción, empezando pola propia monarquía”. Finalmente, reclamou que se “recoñeza” a “realidade das nacións que hoxe son negadas polo Estado español” e “o seu dereito a decidir” e no caso de Galicia, que se recoñeza “o seu dereito a existir como Estado”.