O alcalde de Ponte Caldelas reúnese cos traballadores de Tafisa

O rexedor de Ponte Caldelas na reunión cos traballadores de Tafisa

O alcalde de Ponte Caldelas, Perfecto Rodríguez, recibiu no seu despacho da Casa Consistorial aos representantes do comité de empresa de Tafisa en resposta á petición formulada, neste sentido, polos representantes sindicais. Esta é a segunda vez que o rexedor se entrevista cos membros do comité desde que estalou o conflito laboral e foi a primeira autoridade que accedeu a manter un encontro cos traballadores tras coñecerse a decisión de Sonae de pechar a planta de Tafisa na Reigosa.

Durante a reunión os traballadores expuxeron ao alcalde as xestións realizadas ao longo dos últimos días e agradecéronlle a súa preocupación polo futuro do persoal, así como a súa intercesión para facilitar entrevistas co IGAPE e o propio conselleiro de Industria, que se producirá a próxima semana.

Perfecto Rodríguez tamén trasladou aos representantes dos traballadores o resultado das súas conversacións con diferentes organismos e coa xerencia da propia empresa quen lle manifestou ao rexedor que a decisión adoptada de peche da factoría en Ponte Caldelas procede directamente do grupo portugués Sonae quen, ao parecer, ten asumida de maneira irrevogable esta resolución.

Finalmente, en contestación ás preguntas realizadas polos representantes sindicais dos traballadores, o alcalde de Ponte Caldelas confirmoulles que, até o momento, non tiña coñecemento de ningunha empresa ou particular interesado en adquirir a parcela situada na Reigosa, onde se sitúa a factoría de Tafisa.

O rexedor comprometeuse a que, no caso de que se producise algún movemento neste sentido, trasladaría con total transparencia o tema aos traballadores para que coñecesen de primeira man calquera novidade que puidese producirse respecto diso.

A reunión finalizou co desexo expresado polo alcalde, Perfecto Rodríguez, de que o persoal poida atopar unha saída satisfactoria a este problema co fin de que logren manter os seus postos de traballo nas mellores condicións posibles e reiteroulles a súa colaboración para aquelas cuestións que consideren que poida ser útil e efectiva a súa participación.