Mos avanza na mellora dos viais municipais

Viais de tres parroquias mosenses están a ser mellorados gracias a traballos de asfaltado financiados pola Deputación de Pontevedra.

Trátase da Estrada Pedreira, na parroquia de Dornelas, onde xa se rematou a reposición do firme; do Camiño de Campo de Eiró ata o Longo de Campo de Eiró que abarca as parroquias de Pereiras e Sanguiñeda, no que están a traballar os operarios actualmente; e o Camiño de Reguengo en Petelos, onde as obras comezarán próximamente.

Precisamente esta mañá visitaban o Camiño de Campo de Eiró para comprobar o óptimo desenvolvemento dos traballos de reposición da capa de rodadura, a alcaldesa de Mos, Nidia Arévalo, o concelleiro de Vías e Obras, Alberto Méndez, e os edís das parroquias de Pereiras e Sanguiñeda, Kely Monzón e Isidoro Táboas, respectivamente.

O orzamento destinado a estas obras ascende aproximadamente a 148.000 euros e a extensión dos traballos a realizar suma uns tres kilómetros de lonxitude, correspondendo sobre un kilómetro por cada vial asfaltado.

Sobre estas melloras a rexedora local e o edil de Vías e Obras declararon sentirse satisfeitos por poder optimizar a comodidade do tránsito tanto peonil como rodado en tres parroquias do municipio pero, sobre todo, por incrementar a seguridade vial nas mesmas.

Actualmente e duns meses a esta parte son moitas as vías municipais que están a ser reformadas mediante reafirmado do pavimento. En total, tal e como informou Arévalo, durante o período 2012-2015 haberanse investido preto de dous millóns de euros en asfaltados, a meirande parte desta cantidade obtida a través de plans de investimentos doutras administracións tales coma Xunta de Galicia e Deputación Provincial.