Miño recibirá unha achega de 8.000 euros para a contratación de persoal na oficina de turismo

A delegada territorial da Xunta, Belén do Campo, mantivo esta mañá un encontro de traballo co alcalde de Miño, Jesús Veiga, no que lle comunicou que o concello, declarado Municipio Turístico de Galicia, recibirá unha achega de 8.000 euros para a contratación de persoal este verán na súa oficina de turismo.

“Turismo de Galicia convoca estas axudas co obxectivo de manter a calidade no servizo de información turística e, deste xeito, potenciar a imaxe de tanto os Municipios Turísticos como de toda a comunidade no exterior”, indicou Do Campo. Esta acción enmárcase na liña de medidas impulsadas pola Xunta de Galicia en virtude da Lei do Turismo de Galicia. A norma determina unha atención preferente nas liñas de medida de fomento económico do Goberno galego para as entidades locais con este recoñecemento.

Do mesmo xeito, o Plan Integral de Turismo de Galicia recolle accións destinadas a impulsar o desenvolvemento dos destinos a través da creación dunha rede de técnicos de Municipios Turísticos para o fortalecemento dos mesmos como destino turístico. Búscase así todo o tipo de medidas como o desenvolvemento de campañas promocionais dos municipios de cara da desestacionalización, a creación dunha estratexia para a dinamización dos municipios turísticos con vocación sostible e enfocada á creación de destinos intelixentes, o establecemento dun Sistema Estandarizado de Recollida de Información de Estudos de Mercado turístico, a través de enquisas a visitantes e empresas do sector turístico dos municipios, así coma o seguimento de indicadores clave.

Neste senso, a delegada territorial indicou que na provincia da Coruña veranse beneficiados por estas achegas nove municipios: Betanzos, Miño, Ribeira, Laxe, A Pobra do Caramiñal, Fisterra, Cedeira, Padrón e Pontedeume. En total, recibirán 52.066 euros. En toda Galicia, o departamento autonómico inviste este ano 231.776 euros, dirixidos a 34 concellos das catro provincias galegas que contan coa distinción de Municipio Turístico.