Máis de 11.000 nenos participan nas actividades das festas de San Xoán

O Concello, a través da área de Cultura que dirixe Ana Fernández, informa de que máis de 11.000 nenas e nenos participaron nas actividades organizadas con motivo da celebración das festas de San Xoán, entre os días 15 e 24 de xuño.

Co obxectivo de que a programación chegase aos máis pequenos e a todos os barrios da cidade, a música, o circo e as artes escénicas desenvolvéronse, ademais de nos xardíns de Méndez Núñez ou na praza de María Pita, noutras zonas da cidade como Novo Mesoiro, Os Mallos, Oza, rúa Barcelona, Ensanche, Eirís, A Gaiteira, Os Rosales, Mariñeiros, Vioño, praza de Lugo, Feáns, praza de Pablo Igrexas, parque Europa ou San Diego.

Así, os pasacalles, a cargo de 13 artistas de Manicómicos cun espectáculo sobre a mitoloxía de San Xoán, e os espectáculos Don Gelati e A verdadeira historia de Crusoe e Venres, chegaron a 16 barrios da cidade e contaron cunha participación de 3.000 nenas e nenos.

Durante o fin de semana do 21 e 22 de xuño, os Xardíns de Méndez Núñez acolleron unha gran festa coa presenza de dúas das compañías máis recoñecidas no que respecta a programación infantil: Lex Festijeux, co seu espectáculo A Cocinita saborosa, e Galiot Teatre, cos Monicreques. Nestas actividades participaron 2.000 menores. Na gran festa do San Xoán Pequeniño, o día 24 na praza de María Pita, sucedéronse infinidade de actividades encabezadas por unha das bandas con maior repercusión no panorama infantil a nivel nacional: Petit Pop, un grupo de música infantil formado por coñecidas integrantes de grupos como Pauline na Praia, Nosoträsh, Undershakers ou Edwin Moses. Nesta ocasión, asistiron á praza de María Pita 5.000 nenas e nenos.

As festas de San Xoán tamén incluíron unha sardiñada no parque de Santa Margarita, na que se repartiron 2.500 racións de sardiñas e varios concertos:

– na praza de María Pita: Los Secretos (10.000 asistentes) e La Unión, Nacha Pop e Los Limones (10.000 asistentes);

– na chaira de Riazor: Afasto Stivel, Seguridad Social e Danza Invisible (6.000 asistentes);

– parque de Santa Margarita: BiPolar Fest (6.000 asistentes).

A CIDADE DOS RAPACES

Ademais, durante este fin de semana, a chaira de O Parrote converterase nun espazo de xogo, maxia, teatro, cine, música e diversión para os máis pequenos; cumprindo cunha das prioridades do Goberno municipal e aproveitando un emprazamento único da cidade que ofrece infinidade de posibilidades, conta cun potencial extraordinario e pon a disposición dos veciños e visitantes 23.000 metros cadrados de espazo público. Para iso e co obxectivo de que todos os cidadáns coñézano, o novo aparcadoiro de O Parrote será gratuíto durante o fin de semana; en concreto, desde as 13.00 horas de hoxe venres, cando se abrirá ao público, até as 24.00 horas do domingo.

Así, os días 28 e 29 de xuño, de 12.00 a 14.00 horas e de 17.00 a 20.00 horas, a chaira de O Parrote acollerá unha proposta que inclúe microcine, microteatro e micromagia; danza, equilibrios e contorsión da man de Shakti Olaizola con Irrakurriz; maxia, con Charli Mag; ou a colocación de dúas grandes instalacións de xogos para nenos a partir de 4 anos (Cores de monstro, da compañía Tombs Creaticus); e para nenos até os 4 anos (Apicirc, da compañía Pessic de Circ). Ademais, é a primeira vez que a programación infantil en rúa ofrece actividades dirixidas a todos os nenos, incluídos o período de idade que vai desde os 0 aos 3 anos, dando resposta a unha demanda familiar que reclamaba este tipo de espectáculos.