Louzán destaca o cambio de tendencia dos datos do desemprego

O presidente da Deputación de Pontevedra, Rafael Louzán, destacou hoxe o “cambio de tendencia” que reflicten os datos do desemprego do mes de maio pero anima a seguir poñendo todos os esforzos na creación de emprego.

“Son sete meses consecutivos de redución do paro en Galicia, polo que temos que falar de datos positivos que nos confirman que estamos ante un verdadeiro cambio de tendencia”, asegurou, pero iso non debe levar “a esquecer que temos 4,5 millóns de desempregados en España e 105.274 en Pontevedra”.

“Son moitas persoas que queren traballar e que non poden. Polo tanto, non podemos perder de vista que o noso obxectivo ten que seguir sendo, por riba de calquera outro, reducir unha cifra de desemprego que non é asumible”, afirmou.

Malia todo, incidiu en que hai que valorar a evolución nos últimos meses, non só no que respecta ao desemprego, senón tamén, e sobre todo, os relativos á afiliación á Seguridade Social –con 2.886 afiliados máis na provincia de Pontevedra no mes de maio-, algo que cualificou como “o máis positivo dos datos, porque fala de que se está a crear emprego neto”.