Guillermo González Gómez do Carballiño revalida o título de campión barista de Galicia

Luis Blanco, Guillermo Gómez e Damián Seijas

O barista Guillermo González, que desenvolve o seu labor profesional no Moon 93, Café & Cocktail Bar (r/ Alameda, 9), do Carballiño, fíxose esta tarde co título de Campión Barista de Galicia, por segundo ano consecutivo. O que lle permitirá representar novamente á autonomía no Campionato Barista de España, que este ano se celebrará os días 20 e 21 de outubro no Salón Hostelco, en Barcelona.

O segundo posto correspondeu a Damián Seijas, do Picota – Espazo Gastronómico, de Monforte de Lemos (r/ Bailén, 17), e o terceiro a Francisco Luís Branco, do Hotel Restaurante A Queimada, de Nigrán (Praza da Carrasca, 5).

Os tres repartíronse os outros recoñecementos outorgados no campionato: Francisco Luís Branco Valverde fíxose co galardón ao Mellor Espresso, entregado aos mellores cafés sós; Damián Seijas logrou o recoñecemento ao Mellor Cappuccino Arte, entregado ao mellor cappuccino decorado coa cada vez máis popular técnica do Latte Art; e o propio Guillermo González fíxose acredor do galardón á Mellor Bebida de Especialidade, outorgado ao mellor cóctel a base de café.

Organizada polo Fórum Cultural do Café, Cafento e Área Central, e patrocinada por Brita, Crem International, Lotus Bakeries, Markibar e Cerámicas Sant Pancraç, a novena edición do certame, á que concorrían oito dos maiores expertos en café de Galicia, celebrouse durante esta tarde en Área Central, en Santiago de Compoostela.

Os baristas tiveron que preparar en 16 minutos catro espressos, dous cappuccinos arte (decorados coa técnica do latte art), e catro bebidas de especialidade (cócteles a base de café): dúas delas con alcol e dous sen.

Todo iso baixo a atenta mirada de sete xuíces baristas homologados polo Fórum Cultural do Café: dous xuíces sensoriais, dous técnicos, dous xuíces de control e un xuíz líder, que avaliaron a técnica, a calidade e a orixinalidade das bebidas, así como a posta en escena e a precisión con que os baristas participantes describían cada un dos seus preparados e as súas calidades.

Sobre o Campionato de España de Baristas

O Fórum Cultural do Café organizará este ano a oitava edición do Campionato de España de Baristas, co que se pretende divulgar a cultura do café e prestigiar a figura do barista como profesional e experto en café de calidade. Terá lugar os días 20 e 21 de outubro no Salón Hostelco, en Barcelona.

Constituída en 1996 e oficializada en 1997, esta asociación sen ánimo de lucro reúne a profesionais e empresas do sector do café de toda España. O seu obxectivo principal é transmitir a cultura do café aos profesionais e aos consumidores, velando polo interese xeral de todas as persoas ou empresas involucradas na cadea de produción, distribución e consumo e organizando actividades de interese para os seus asociados, de carácter formativo, técnico, artístico, lúdico ou cultural.