Deteñen a un veciño de Poio polo roubo de varias colmeas

Colmeas roubadas

A Garda Civil detivo a S.M.O.A., de 20 anos de idade e veciño de Poio (Pontevedra), como presunto autor do delito de roubo de colmeas en distintas parroquias do citado municipio, perpetrados a finais do pasado ano 2013 e no mes de abril deste 2014.

Compoñentes do Posto da Garda Civil de Pontevedra, que desde meses atrás realizaban investigacións sobre o esclarecemento destes roubos, localizaron tres explotacións avícolas nos montes dos municipios pontevedreses de Poio e Barro e comprobaron que ningún destes asentamentos estaban rexistrados como tales e que algún dos caixóns que forman as colmeas coincidían coas denunciadas como subtraídas.

No marco das investigacións, os gardas comprobaron que as tres colmeas eran explotadas pola mesma persoa, polo que se procedeu á súa identificación e detención ao non poder acreditar a procedencia das colmeas e dunha máquina-centrifugadora para a extracción do mel que tiña instalada nunha nave industrial da súa propiedade, ademais de recoñecer a venda do mel producido a terceiras persoas.

O Instituto Armado sinalou que se recuperaron dez colmeas subtraídas que o citado individuo montara en tres montes distintos, e sobre as que realizaba trámites para a súa legalización, e unha centrifugadora para a extracción do mel.

O detido quedou en liberdade coa obrigación de presentarse ante o Xulgado de Instrución número 1 de Pontevedra, onde foron entregadas as dilixencias instruídas, cando para iso sexa requirido.