Comezan os actos de celebración do V Aniversario da declaración da Torre de Hércules como Patrimonio da Humanidade

Os actos de conmemoración da declaración da Torre de Hércules como Patrimonio da Humanidade organizados polo Consorcio de Turismo que preside Luisa Cid comezan hoxe na contorna do monumento con talleres e xogos infantís ambientados na época romana e prolongaranse até o domingo. Ademais, esta noite o faro iluminarase de azul para lembrar o recoñecemento da Unesco.

Os talleres comezarán ás 17.30 horas e durante tres días os nenos serán os protagonistas. Haberá sete talleres diferentes nos que non será necesario inscribirse previamente. O sábado celebraranse desde as 11.00 horas até última hora da tarde, mentres que o domingo haberá actividades entre as 11.00 e as 15.00 horas. Os nenos que acudan vestidos de romanos ou participen nos talleres serán obsequiados con agasallos. Repartiranse 2.000 sextercios conmemorativos, cascos e espadas.

De forma paralela aos talleres celebraranse charlas sobre a época de construción da Torre de Hércules. O programa completarase cunha escola de lexionarios, con exhibicións e con itinerarios teatralizados. Esta última actividade celebrarase o sábado a partir das 20.00 horas.