Bugallo considera lamentable a situación de Santiago

O deputado do grupo parlamentario socialista e exalcalde de Santiago, Xosé Sánchez Bugallo, criticou a situación “tan excepcional como lamentable” que vive o concello de Santiago, dado que non coñece “ningún caso” no que dos 15 primeiros membros dunha candidatura que obtivo “maioría absoluta” só queden dous.

A preguntas dos medios, Bugallo ironizou con que “casualmente” os dous concelleiros que quedan no goberno (dos 13 edís cos que o rexedor Ángel Currás tomou posesión en 2011) son os que tamén “tiñan que estar” na Xunta de Goberno local na que se decidiu que o Concello se fixese cargo dos gastos de defensa de Adrián Varela (implicado á súa vez na Operación Pokémon), que finalmente levou á inhabilitación e dimisión dos sete edís participantes condenados por prevaricación.

“Débese facer algunha reflexión, se todo isto ten que ver con el ou é mera coincidencia, a mi non me o parece”, sinalou o parlamentario socialista, quen insistiu en que se el fose “algún dos sete, algún mosqueo tería”.

Sobre todo ve “lamentable” que o PP se dedique a “buscar xente fóra” cando quedan 11 persoas na lista de Santiago. Unha decisión, criticou, por a que o partido liderado por Alberto Núñez Feijóo ten a “obriga moral” de “dar explicacións”, aludindo expresamente ao conselleiro de Medio, Infraestruturas e Territorio, Agustín Hernández, que ocupa o último posto na candidatura.

Bugallo advertiu de que a solución a este problema a ten que dar o partido que obtivo a “maioría” do respaldo cidadán e aclarou que non se trata dunha situación comparable ao caso de Marbella, onde a responsabilidade era “transversal”, senón que en Santiago é cousa “dun solo” partido.

“Non poden lavarse as mans”, insistiu o tamén exrexedor da capital galega, recordando o proceso polo que Gerardo Conde Roa foi “designado” e imposto como candidato á alcaldía de Santiago cando Alberto Núñez Feijóo e Alfonso Rueda estaban xa á fronte do PPdeG.

DAR OPCIÓN A “NOVAS XERACIÓNS”

Bugallo reiterou o seu rexeitamento a volver optar á alcaldía de Santiago porque o seu tempo “xa pasou”, e apostou por dar opción “a novas xeracións” e a que “os cidadáns se pronuncien”, insistindo en que a persoa que gañe as primarias será a súa “candidata”.

Así, sinalou que esta situación evidencia que “non todos son iguais” e da xente debe comprender que “o seu voto é importante e decisivo”, dado que ás veces “se producen consecuencias”.