As rúas de Lugo contarán con 90 toneladas de lixo ao finalizar a primeira xornada de protestas

Os cálculos dos convocantes da folga en Urbaser, a empresa concesionaria do servizo da limpeza en Lugo, calculan que ao final desta xornada se acumularán en torno ás 90 toneladas de lixo nas rúas da cidade, a só tres días de que arranquen as actividades do Arde Lucus.

O paro indefinido conta co respaldo de todo o equipo, de 139 traballadores, tras unha asemblea celebrada o luns a última hora da noite, e tras non aceptar, a dirección, a mediación do Consello Galego de Relacións Laborais, que previamente pedira a empresa por recomendación do Concello de Lugo.

A responsable da federación de servizos da UGT, Araceli Núñez, xustificou a folga porque a empresa “se comprometeu a unha mediación no día de onte para chegar a un acordo e finalmente non se produciu”. Foi precisamente este compromiso o que atrasou a convocatoria nun día.

“O comité de empresa chegou á asemblea e explicámoslle aos traballadores a situación e eles por unanimidade decidiron activar a folga porque consideraban que era unha falta de respecto ao equipo, á cidade e ao concello, que foi quen intercedeu para que Urbaser solicitará a mediación”, argumentou.

Núñez calcula que precisamente ao final do día de hoxe, primeira xornada de folga, sobre 90 toneladas de desperdicios amorearanse na cidade amurallada, nas vésperas da celebración do Arde Lucus, a próxima fin de semana, festa de exaltación do pasado ‘castrexo’ romano de Lugo e que reúne centos de miles de persoas.

No fondo do conflito laboral subxacer a conxelación salarial que sofren os traballadores, que non ven actualizadas as súas nóminas dende o ano 2011. Araceli Núñez advertiu que van defender “os dereitos adquiridos” de estros traballadores. “O principal obxectivo é chegar a un acordo, pero sempre e cando na outra parte non nos atopemos con ameazas ou condicionantes e o equipo seguirá coa folga ao cen por cen”, alertou.

Ademais precisou que por parte dos traballadores fíxose a concesión de ter dispoñible un condutor e dous peóns para que “poidan garantir os servizos que se consideran esenciais, como poden ser hospitais, comedores sociais, centros da saúde e a dirección da empresa, impedindo que saísen eses traballadores a realizar eses servizos”. E é que o equipo rexeitou os servizos mínimos impostos pola empresa, ao consideralos “abusivos”.