As reivindicacións dos veciños de Teis obrigan a suspender o pleno do Concello de Vigo

Os veciños de Teis obrigan a suspender o pleno

O pleno extraordinario para aprobar os orzamentos que se está celebrando este venres no Concello de Vigo tivo que ser suspendido, inicialmente de forma momentánea, polo alcalde da cidade, Abel Caballero, ante as irrupcións continuas dos veciños do barrio de Teis.

A penas 20 minutos despois de que dese comezo o pleno desta mañá e durante a comparecencia de Carmela Silva, varios veciños de Teis mostraron varios carteis indicando que “o cívico é de Teis”.

Ademais, acusaron aos concelleiros do PSOE e o PP de ser uns “mentireiros” e uns “caraduras” e pediron aos portavoces de ambos os grupos que “dean a cara” e digan “algo ao pobo”. Así mesmo, tras a suspensión do pleno, seguiron gritando lemas como “Caballero mentireiro, Figueroa tramposo” e “connosco non podedes, o cívico é de Teis”.

Aínda que o pasado día 4 o grupo municipal do Partido Popular de Vigo comprometeuse a buscar unha saída para que a Asociación de Veciños de Teis poida manter a xestión do centro cívico do barrio, as críticas dirixíronse indistintamente aos dous grupos maioritarios do concello, PP e PSOE.

Os veciños do barrio vigués iniciaron hai meses varias mobilizacións para denunciar publicamente que o Concello de Vigo non incluíu nos orzamentos de 2014 unha partida destinada ao centro cívico da parroquia e que o Goberno municipal pretende privatizar este centro e “convertelo nunha empresa”.