As Mariñas Coruñesas logra o acordo para a cesión de terreos privados a persoas en paro para actividade agraria

A reserva de biosfera estrea o seu banco de terras. As Mariñas Coruñesas ha intercedido entre o propietario dunha leira e un dos alumnos do seu programa de emprego “Rural emprende” para que o primeiro ceda a parcela ao segundo con obxecto de proporcionarlle un medio para o desenvolvemento dunha actividade económica.

Trátase dunha leira de case unha hectárea de superficie situada na parroquia de Ouces, do municipio de Bergondo. As dúas partes formalizaron hoxe o convenio, acompañados do presidente das Mariñas Coruñesas, José Antonio Santiso, no propio terreo.

Coa iniciativa, a reserva de biosfera consegue a revalorización dunha terra en desuso para xerar unha oportunidade de emprego no agro a persoas actualmente en situación de paro. É o caso de Jesús Alberto Patiño, natural de Colombia, e que leva 14 anos en España. Actualmente participa no mencionado plan de emprego “Rural emprende” para formarse e tratar de aproveitar os potenciais do campo galego. Xestionará esta parcela xunto con Armando Balazar, natural de Perú, tamén en paro, e que leva 8 anos en España. O propietario do terreo, desde fai 7 anos, permitirá así o seu aproveitamento, xa que o ten en desuso.

Os plans dos dous beneficiarios pasan agora por preparar o terreo. Dada a época do ano pretenden plantar leitugas ou tomates para nos próximos meses, no momento adecuado, mirar cultivos a maior escala de cebola, millo, pemento, etc. “Estamos moi ilusionados”, confesa Patiño, que recoñece que aínda que será duro bríndaselles unha oportunidade de emprego que queren aproveitar.

O presidente da reserva espera que este primeiro acordo “sirva como exemplo para lograr máis terreos e máis persoas desempregadas interesadas en traballalos”. Santiso está “convencido” de que o campo ten unha boa perspectiva de desenvolvemento económico na comarca para xerar un “mercado de proximidade”.