Arte infantil na Sala de Exposicións de Verín

O venres día 27 de xuño, ás 20 horas, a concelleira de Cultura María Corona Meixeira inaugurará na Sala de Exposicións de Verín a mostra ‘Arte Infantil’, que presenta obras realizadas polo alumnado das Aulas de Iniciación ás Artes Plásticas da Escola de Artes e Oficios.

Os traballos que se exhiben foron realizados nas clases no ano académico que vén de rematar. A selección de traballos para a exposición foi realizada polo alumnado. A exposición permanecerá aberta ao público até o día 8 de xullo e poderase visitar de luns a sábado, das 10 ás 14 e das ás 20.30 horas.

As Aulas de Iniciación ás Artes Plásticas da Escola de Artes e Oficios acollen alumnado de idades comprendidas entre os 6 e os 16 anos. No pasado curso participaron 123 alumnos, agrupados en oito aulas segundo criterios de idade e nivel de coñecementos. Os usuarios reciben dúas horas semanais de formación en días alternos. As clases impártense en horario extraescolar, entre a segunda quincena de setembro e a primeira de xuño. As actividades destas aulas teñen como obxectivos estimular a creatividade plástica e divulgar o patrimonio pictórico e escultórico, e a arte contemporánea entre os máis pequenos. Os conceptos artísticos que se trata de transmitir aos futuros artistas son os de liña, cor e volume. A

A Escola de Artes e Oficios de Verín ten aberto o prazo de preinscrición para o ano lectivo 2014-2015, nas modalidades de Iniciación ás Artes Plásticas, Talla en madeira, Cerámica, Pastel, Pintura e Debuxo Artístico.