Enviar a un amigo
Opinar
ImprimirÁngel Currás confía en que a xunta electoral resolva favorablemente ao concello de Santiago
O alcalde dimisionario de Santiago, Ángel Currás, apostou este xoves por “normalizar xa” o equipo de goberno da cidade e confiou en que a Xunta Electoral Central (JEC) “resolverá proximamente de forma favorable ao concello” o nomeamento dos sete concelleiros non electos, tras os recursos presentados por BNG e PSOE contra a decisión.
A Xunta Electoral Central (JEC) publicou este martes no Boletín Oficial do Estado a aceptación do nomeamento dos sete concelleiros non electos de Santiago á vista da “renuncia” de “todos e cada un dos candidatos” da lista popular, coas únicas excepcións do exconselleiro Agustín Hernández, que asumirá a alcaldía, e a aínda deputada no Congreso Marta González. A continuación, abriu un prazo de dous días para recorrer esta decisión alegando irregularidades nalgún parámetro.
O BNG anunciou xa o martes que recorrerá por vía xudicial o novo Goberno de Santiago por contar cunha maioría de concelleiros non electos -sete de 13-.
Pola súa parte, o voceiro local do PSOE, Francisco Reyes, anunciou este xoves que o seu grupo tamén presentará alegacións contra estes nomeamentos, nesta ocasión ante a propia Xunta Electoral Central.
Para Reyes, a situación de Santiago “non está incluída” nos supostos que permiten designar concelleiros non electos, por o que cre que “non é adecuado” o nomeamento da “maioría de membros do goberno local” fóra da lista que o PP presentou ás últimas eleccións locais, “máxime cando existían na lista 11 persoas que si alcanzaran os votos para cubrir os 9 postos vacantes”.
Francisco Reyes asegurou que esta decisión “non respecta a lexitimidade democrática” e lamentou que o PP realice nesta ocasión un “emprego torticero da lexislación”.
“NINGÚN PROBLEMA”
Pola súa banda, Ángel Currás confiou en que os recursos non supoñan “ningún problema” para a configuración do novo equipo e en que a Xunta Electoral Central “resolverá proximamente de forma favorable o concello”.
“O que hai é que normalizar xa o equipo de goberno sumando aos novos concelleiros que agora non están”, indicou Currás, ao tempo que sinalou que “o demais é poñer pedras no camiño, que é algo típico, de sempre, do PSOE e do BNG como grupos municipais”.
