Amplíanse ata o 30 de xuño as visitas guiadas á Torre Norte da Catedral de Santiago

Catedral de Santiago

A Fundación Catedral de Santiago e a Fundación Pecsa decidiron prorrogar ata o próximo 30 de xuño as visitas guiadas ás obras da Torre Norte da basílica compostelana, dada a “boa acollida” da iniciativa.

As visitas, guiadas e en grupos reducidos, xorden a raíz da colaboración entre Pecsa, empresa encargada das obras de restauración, e a Fundación Catedral de Santiago. Trátase de visitas guiadas por arquitectos que percorren a estada para descubrir detalles arquitectónicos da torre e comprender as patoloxías que o afectan, así como o estado dos traballos.

Este proxecto nace vinculado ao programa de micromecenado da Catedral, de maneira que toda aquela persoa que realice unha achega mínima de 25 euros destinada ás obras de conservación na fachada, poderá participar nestas visitas. Esta achega pódese realizar directamente en calquera oficina de Novagalicia Banco ou ben a través da web www.catedraldesantiago.es.

Están programadas dúas visitas ao día, ás 10.30 horas e ás 16.30 horas, de luns a xoves, e unha os venres, ás 10.30 horas. Os grupos teñen un número máximo de seis persoas e están dirixidos a maiores de 18 anos.