Ábrese o prazo de matrícula nos servizos de comedor e de madrugadores

A Xunta de Goberno aprobou os prazos para a formalización da matrícula nos servizos de comedor e de madrugadores na Rede de Centros Públicos de Educación Infantil e Primaria do Concello de Santiago de Compostela para o curso 2014-2015. O prazo de matrícula estará aberto do 20 ao 30 de xuño. Durante o curso 2012-13 púxose en marcha no Concello de Santiago o servizo de comedores e de madrugadores en nove centros públicos de educación infantil e primaria: CEIP Apóstolo Santiago, CEIP Ramón Cabanillas, CEIP Cardeal Quiroga Palacios, CEIP Roxos – Villestro, CEIP Monte dos Postes, CEIP Mestre Rodríguez Xixirei, CEIP Fontiñas, CEIP Vite I e CEIP Raíña Fabiola. Con tal motivo, asinouse un Convenio de colaboración coa Consellería de Educación e Ordenación Universitaria que permite o seu financiamento durante os cursos 2013-2014 e 2014-2015.

Agora ábrese un prazo do 20 ao 30 de xuño de 2014 (ambos os dous incluídos) para a solicitude dos servizos de comedor e de madrugadores en calquera dos devanditos centros. No caso do CEIP Arquitecto Casas Novoa só se ofrece o servizo de madrugadores.

O impreso de solicitude de matrícula, debidamente cuberto, acompañado da documentación solicitada, entregarase no Rexistro Xeral do Concello de Santiago (rúa do Presidente Salvador Allende 4, Galeras) ou nos Rexistros auxiliares do Centro Sociocultural do Ensanche (Frei Rosendo Salvado, 14-16 Baixo) e do Cersia (avenida Alcalde Raimundo López s/n), e os sábados só no Rexistro Xeral, en horario de 9:00 a 14:00 horas. Xunto coa folla de matrícula deberá achegarse a ficha de facturación da empresa Serunión aos efectos de domiciliación dos pagos, única forma de pago establecida.

A documentación a presentar será: solicitude de matrícula de acordo co modelo normalizado, documentación complementaria, unha fotografía recente tamaño carné, fotocopia da tarxeta sanitaria e ficha de facturación da empresa Serunión. Os modelos oficiais poden descargarse nesta web ou solicitarse no Departamento de Educación (Edificio Cersia), así como nos centros de ensino obxecto desta convocatoria, comedores escolares e na páxina de comedores escolares, www.serunion-educa.com.

As admisións realizaranse por rigoroso orde de entrada no Rexistro Municipal ata cubrir as prazas dispoñibles, 950, segundo a estimación de comensais do servizo. O Departamento de Educación publicará a lista de admitidos e excluídos nesta web. O proceso de matriculación non garante a obtención de praza.

Inicio dos servizos e réxime de prezos
Os servizos de comedor e madrugadores prestaranse os días lectivos do curso escolar 2014-2015, dende o primeiro día ata o último día establecidos no calendario escolar para o curso 2014/2015, nos centros docentes sostidos con fondos públicos na Comunidade Autónoma de Galicia. Na data na que se redacta esta proposta, a Xunta de Galicia non ten aprobado e publicado o calendario escolar 2014-2015.

O prezo para o almorzo para o curso 2014-2015 permanecerá invariable. Non obstante, o prezo do xantar variará en función dos comensais e do número de días lectivos correspondentes. Os prezos para o curso 2014-15, serían os seguintes:

– Almorzo: 2,04 euros (IVE engadido).

– Xantar: o prezo proposto polo adxudicatario é de 3,31 euros (IVE engadido). A este importe descontaráselle a achega do Concello, que virá determinada polo número de días lectivos do curso 2014-2015.

Os usuarios dos servizos deberán efectuar o pago mensual dos servizos solicitados por adiantado, nos últimos cinco días do mes anterior á prestación do servizo. A falta de abono do prezo do servizo nos prazos e condicións establecidos dará lugar, como medida cautelar, á baixa inmediata no servizo.