A Xunta e o Concello de Santiago compasarán os seus tempos para ter alcalde canto antes

O vicepresidente do Goberno galego e conselleiro de Presidencia, Alfonso Rueda, asegurou que “a golpe de luns”, en relación á situación da Casa do concello de Santiago, pode asegurar que “Xunta e Concello compasarán os seus tempos para que haxa alcalde canto antes”.

Roda participou, xunto co presidente do Tribunal Superior de Xustiza de Galicia (TSXG), Miguel Ángel Cadenas, na visita ao novo edificio xudicial na cidade de Ourense, e, tras un breve percorrido por diversas plantas, respondeu a preguntas dos xornalistas sobre as previsións en relación ao que será novo alcalde de Santiago, o actual conselleiro de Medio Ambiente, Agustín Hernández.

Alfonso Rueda detallou que os tempos do Concello inclúen que os edís que presentaron a súa dimisión renuncien ao seu cargo nun pleno municipal, previsto para esta semana, no que tamén haberá que dar razón dos novos nomes que anunciou o futuro alcalde compostelano.

“Respectando os prazos, pero o máis rápido posible, o lóxico é que o cambio de alcalde se produza canto antes e compasaremos o cambio de alcalde coa substitución de Agustín Hernández na Consellería, sen demorar a súa posesión como rexedor nin deixar a Consellería sen titular”, detallou.

Tamén Rueda manifestou que non sabe se o próximo Consello da Xunta, previsto para este venres, contará co conselleiro Agustín Hernández ou coa persoa que o substitúa, ademais de descoñecer “de verdade”, quen será ese substituto. Así, insistiu en que non sabe se “chegará ao conselo do venres con substituto ou non”.

“IGUAL DE BEN”

Preguntado sobre se os cambios nas consellerías se cinguirán á do conselleiro de Medio ou se afectará algunha máis, Alfonso Rueda sinalou que esa decisión “é competencia do presidente da Xunta como xefe de Goberno e responsable de nomear conselleiros”.

Non obstante, dixo esperar “que o substituto o faga, como mínimo, igual de ben que Hernández, xa que despois de cinco anos de traballo con el, deixa o listón ben alto”.