A tenente de alcalde de Santiago asegura que outras cidades lles piden o fallo que condenou a 7 edís

A tenente de alcalde de Santiago, Reyes Leis, afirmou que lles están a chegar dende “outras cidades” españolas peticións para coñecer a sentenza que condenou aos sete edís da xunta de goberno local do 30 de maio de 2013 por un delito de prevaricación, xa que existe “preocupación”·.

Preguntada por se agora que vai ser a secretaria da xunta de goberno teme que poida rematar nunha situación similar á dos seus excompañeiros, Reyes Leis apuntou que está a recibir “consultas”, porque hai xente que “quere saber qué riscos está a asumir”.

“Porque isto non o esperaba ninguén, nós os primeiros. Hai moitísima xente da administración que está realmente preocupada porque interpretacións de informes positivos que avalan decisións de políticos poidan rematar na mesma situación que a de Santiago”, manifestou.

En todo caso, Reyes Leis asumiu a responsabilidade que lle corresponde agora, e recordou que a xunta de goberno compostelana sempre aproba asuntos cos correspondentes informes.

Por outro lado, a preguntas de se considera que os seus compañeiros Luis Meijide e José Rosende deberían asumir responsabilidades no goberno local e se o feito de que non o fagan pode estar vinculado coa situación que vive o Concello, Reyes Leis destacou a “dedicación” de ambos os dous edís, que le “dedican moitas horas” ao Concello “sen cobrar absolutamente nin un euro”.

Indicou que ambos os dous teñen os seus respectivos traballos, polo que de aí que se manteñan sen competencias delegadas polo alcalde na situación provisional na que están Currás e ela, que asumiron todas as áreas de goberno ata que a conforme goberno tras as nove dimisións -as dos sete edís condenados, Adrián Varela e Rebeca Domínguez-.