A renuncia dos edís inhabilitados de Santiago ratificarase nun pleno no que se informará dos seus relevos

A renuncia dos sete edís de Santiago inhabilitados trala súa condena por prevaricación será ratificada este mércores, xunto coa da concelleira Rebeca Domínguez, nun pleno extraordinario que tamén servirá para tomar coñecemento dos seus relevos, como primeiro paso para que empece a andar o novo goberno local que liderará o ata agora conselleiro Agustín Hernández en substitución de Ángel Currás.

Superado este trámite, remitirase de inmediato á xunta electoral a documentación das renuncias e tamén a proposta de substitutos que formalizará o PP por proposta de Hernández para un goberno no que, polo momento, se mantén Currás como concelleiro malia renunciar ao bastón de mando.

En menos de dez días, cando a xunta electoral remita as credenciais dos novos edís, Hernández podería ser xa investido oficialmente o novo alcalde da cidade.

En concreto, a orde do día do pleno que arrancará ás 13,00 horas en Raxoi contempla cinco puntos, empezando pola toma de coñecemento da sentenza que condenou por prevaricación aos sete concelleiros do PP que acordaron que o Concello se fixese cargo dos gastos de defensa do seu compañeiro de corporación Adrián Varela, imputado na Operación Pokémon.

Os concelleiros condenados e que dimitiron son María Pardo, quen exercía de tenente de alcalde, delegada de Urbanismo e voceira da Xunta de Goberno Local; Cecilia Sierra, edil de Facenda; Francisco Noya, de Participación Cidadá e Festas; Amelia González, de Réxime Interior e Persoal; Juan de la Fuente, de Vías e Obras; María Castelao, de Servizos Sociais; e Luis García Bello, de Seguridade e Mobilidade.

OUTRAS RENUNCIAS

Na mesma sesión informarase do escrito de renuncia ao cargo de Rebeca Domínguez, quen comunicou a Currás a súa dimisión “irrevogable” só un día despois que os seus sete compañeiros. Domínguez accedera á acta de edil en maio de 2012, tras a dimisión como alcalde de Gerardo Conde Roa, imputado por unha fraude fiscal polo que acabou por ser condenado.

Aos poucos meses, en decembro do mesmo ano, Rebeca Domínguez foi imputada pola xuíza Pilar de Lara na Operación Pokémon, ante a cal declarou en relación a un suposto delito de tráfico de influencias na contratación do persoal da escola infantil de Salgueiriños, que fora adxudicado a Sermasa, empresa do Grupo Vendex.

A estas oito renuncias súmase a de Adrián Varela, quen dimitira uns días antes de que transcendese a sentenza condenatoria dos seus compañeiros, no mesmo día en que foi citado a declarar en calidade de querelado (figura análoga á de imputado nos casos de denuncias), a raíz da querela presentada contra el pola CIG despois de que pedise o despedimento da muller dun sindicalista. A dimisión de Varela xa foi ratificada nun pleno previo.

Como cuarto e quinto punto, informarase ao pleno dos escritos de renuncia a ocupar as vacantes de concelleiros por parte de membros da lista electoral do PP, así como da proposta de novo equipo de Hernández, na súa maioría conformado por concelleiros non electos, entre os que se atopa a histórica María Jesús Sáinz, e ao que tamén se incorporou a deputada Marta González, que si ía no número 24 da candidatura popular de 2011.