A policía de Ferrol denuncia a catro condutores dentro da campaña de control de consumo de alcohol e drogas ao volante

A Xefatura de Policía Local de Ferrol informou hoxe dos resultados obtidos da campaña de prevención no consumo de alcohol e drogas levada a cabo entre os condutores que circulaban polo termo municipal. De xeito máis concreto, os axentes realizaron catro controis en vías principais do municipio, dos cales tres corresponden a días laborais en horario de mañá e tarde, e un a fin de semana en horario nocturno.

En canto aos resultados de dita campaña, os gardas locais controlaron un total de 165 vehículos, dos cales 123 foron controlados en días laborais -o que supón o 74,5%- mentres que o fin de semana/festivo se efectuaron probas de alcoholemia a 42 condutores, o 25,5%. Esta medida pretende dar prioridade á prevención durante as horas de maior afluencia de público aos locais de ocio nocturno, xa que isto interfire de forma habitual no resultados dos accidentes de tráfico producidos os fines de semana ou véspera de festivos.

Do total de condutores controlados durante a campaña, 101 eran homes e 64 mulleres. E no que atinxe á media de idade, a media dos condutores examinados sitúase en máis de 50 anos, no caso dos varóns, e entre os 30 e os 50 anos nas mulleres. Sumando as incidencias de toda a campaña, os axentes rexistraron catro probas de alcoholemia positivas, sendo tramitadas como un presunto delito contra a seguridade viaria ao superar a taxa establecida de 0,60 mg/l, e sen que se denunciase ningún positivo por infracción administrativa. Ademais e segundo a Policía Local, non se rexistrou ningún positivo nos controis efectuados de forma puntual por consumo de drogas ou sustancias estupefacientes en atención a posibles síntomas.