A oposición reclama a inmediata dimisión dos concelleiros condenados

Os voceiros dos grupos da oposición do Concello de Santiago reclamaron a inmediata dimisión dos sete edís do PP condenados a nove anos de inhabilitación, mentres o Goberno local aínda se atopa estudando a sentenza e non deu a coñecer o paso que tomará ante o fallo xudicial.

O voceiro do grupo socialista no Concello de Santiago, Francisco Reyes, aplaudiu a “independencia” e “axilidade” da Xustiza á hora de abordar unha situación desta índole.

Así mesmo, advertiu de que a sentenza “deixa claro” o que o PSdeG dicía cando se abriu xuízo oral, que os concelleiros imputados “dimitían que dimitían” para evitar esta “imaxe terrible” para a capital galega, a de Xunta de Goberno en pleno “sentada en banco” e agora condenada.

Sobre todo criticou que os concelleiros imputados non foron capaces de mostrar “xenerosidade” aos cidadáns de Santiago e puxeron por diante “os seus intereses de ambición política” antes que os da propia cidade de Santiago. “Deben dimitir hoxe mesmo”, reiterou.

“Atopámonos a unha Xunta de Goberno en pleno condenada penalmente por un delito de prevaricación a 9 anos de inhabilitación”, insistiu Reyes, quen sinalou que o PP ten a “responsabilidade ao 100%” do que acontece no Concello e é “quen ten que dar unha solución”.

Sobre a próxima actuación do Goberno local, Reyes consideran que calquera solución ten que pasar pola asunción de “responsabilidade ao 100%” por parte do PP pero que a constitución dunha xestora “non é asumible” para o PSOE, polo que instou a Alberto Núñez Feijóo a mostrar se “ten confianza nas persoas que restan” na lista de Santiago e asumir a súa responsabilidade.

Tras recordar que entre os que conforman a lista atopa o conselleiro de Medio Ambiente, Territorio e Infraestruturas, Agustín Hernández, considerou que é a súa ocasión para demostrar que “quere” á cidade de Santiago “por enriba de calquera situación ou circunstancia” e dimitir do seu actual cargo “por compromiso”.

“TEÑEN QUE DIMITIR HOXE”

Pola súa parte o voceiro municipal do BNG, Rubén Cela, advertiu da “situación absolutamente límite” que vive a cidade de Santiago de Compostela “por culpa da irresponsabilidade” e “o mal facer do PP”, con dez imputados nalgunha das seis causas que afectan ao grupo de goberno.

Cela acusou ao presidente da Xunta, Alberto Núñez Feijóo, de estirar “tódolos tempos” para evitar a convocatoria de eleccións anticipadas e “non resolver os problemas votando”, lamentando que a partir de agora “calquera solución” a esta situación “é mala”.

“O alcalde non pode seguir nin un día máis”, advertiu Rubén Cela, quen o ve “deslexitimado” e “desprestixiado” para encabezar o Goberno local. Por iso, pode “tolerancia cero” coa corrupción e esixiu que os concelleiros imputados presenten “de modo fulminante” a súa dimisión.

Así mesmo, considerou que Feijóo “debe dar explicacións” por impedir aos veciños “opinar” nas urnas sobre a situación do Concello, insistindo en que con eleccións anticipadas Santiago tería “un goberno lexitimado”.

“É unha falta de respecto aos veciños”, reiterou o voceiro do BNG en Santiago, recordando que aínda “hai cinco causas xudiciais máis abertas”, confiando en que “a ninguén do PP” se lle pase pola cabeza “non tomar ningún tipo de medida”.

Sobre o seguinte paso a tomar por parte dos concelleiros afectados, Cela sinalou que “o máis probable” será a renovación dos postos do Goberno local que queden baleiros coa marcha dos sete edís inhabilitados.

CONDENADOS

Os concelleiros condenados son María Pardo, tenente de alcalde, responsable de Urbanismo e voceiro da Xunta de Goberno Local; Cecilia Sierra, concelleira de Facenda; Francisco Noya, de Festas; Amelia González, de Réxime Interno e Persoal; Juan de la Fuente, de Obras; María Castelao, de Servizos Sociais; e Luis García Bello, de Seguridade Cidadá.

Todos eles aprobaron en Xunta de Goberno pagar a defensa a Adrián Varela, implicado á súa vez no caso Pokémon e quen presentou a súa dimisión o pasado luns alegando que o facía, precisamente, en solidariedade cos seus compañeiros que sentaran no banco o 19 de maio.

Non obstante, o mesmo día que formalizou a súa renuncia fora citado a declarar en calidade de querelado a raíz da querela presentada contra el pola CIG despois de que pedise o despedimento da muller dun sindicalista.