A delegada territorial da Xunta na Coruña participa na reunión do padroado da Fundación Ortegalia

Belén do Campo na reunión do padroado da Fundación Ortegalia

A delegada territorial da Xunta na provincia, Belén do Campo, e o alcalde de Ortigueira, Rafael Girón, presidiron hoxe a reunión ordinaria do padroado da Fundación Ortegalia, na que se aprobaron as contas anuais e a memoria económica de 2013. Así, a liquidación do orzamento do anterior exercicio arroxou un resultado positivo, concretamente de 3.113 euros.

Na xuntanza, tamén se aprobou a memoria de actividades do pasado exercicio, no que se aumentaron as actividades de calendario, cun total de 19 accións formativas e divulgativas, entre elas a celebración dos tradicionais maios e calabazotes, o concurso de postais de Nadal e a realización de ata dez exposicións temporais. De igual xeito, mantívose o traballo de fondo con programas para a divulgación do patrimonio do Ortegal ou a investigacións sobre a toponimia do concello de Ortigueira. Tamén se asinou un convenio de colaboración coa Universidade da Coruña para facilitar a realización de prácticas na entidade dos alumnos da Facultade de Humanidades.

Neste 2014, o obxectivo da programación da fundación será continuar coa posta en valor do patrimonio cultural, etnográfico e histórico da comarca do Ortegal e o desenvolvemento de iniciativas destinadas a actualizar permanentemente os contidos do museo Ortegalia. Así, no encontro deuse luz verde a máis de 30 actividades, entre as que destacan 18 propostas formativas e divulgativas e 12 exposicións temporais dirixidas ao público. Ademais, apóstase pola incorporación de novas temáticas á oferta de iniciativas históricas e medioambientais, co ánimo de captar novos públicos.

Na mesma liña, e polo seu carácter estratéxico, desde a fundación destácase a posta en marcha do “Espacio Artegalia”, un proxecto destinado a abrir as instalacións do museo Ortegalia a todos aqueles artistas que desexen expoñer temporalmente a súa obra. A iniciativa pretende dar a coñecer e promocionar a obra de sete artistas e, en paralelo, renovar de forma continuada os contidos do centro como acción dinamizadora e potenciadora da repetición de visitas.