A Coruña pon en marcha un programa de visitas guiadas ás baterías do Monte de San Pedro

Carlos Negreira na visita ás baterías do Monte San Pedro

O alcalde da Coruña, Carlos Negreira, acompañado polo xeneral Xefe da Forza Loxística Operativa, Francisco Javier Abajo, visitou esta mañá as baterías do Monte de San Pedro e anunciou que, desde mañá martes 17 de xuño, abriranse ao público a través dun programa de visitas guiadas.

“Animo a todos os coruñeses e turistas a que realicen esta visita. É un punto máis a favor do Monte de San Pedro que xa recibe anualmente máis de 400.000 visitas”, asegurou e continuou: “Trátase dun feito diferencial porque é a única destas características que se pode visitar en toda a península”. Tal e como explicou Negreira, os cidadáns poderán visitar, desde mañá, o Museo-Centro de Interpretación, o telémetro, a sala do posto de observación, a sala de dirección de tiro e a peza exterior leste: “Poderán coñecer as entrañas da batería, non só o que está a primeira ollada, para comprender mellor o que supuxo este sistema de defensa, que desde a súa posta en marcha tardou catro anos en realizar o primeiro disparo que foi disuasorio”, matizou.

O programa de vistas guiadas comezará mañá martes, 17 de xuño, para grupos dun máximo de 15 persoas en horario de mañá de 11.00 a 14.00 horas e de tarde de 16.00 a 19.30 horas. As visitas guiadas, para as que hai que pedir cita previa a través do 010, as oficinas de turismo ou o mail concejalia.medioambiente@coruna.es, realizaranse todos os días excepto o luns. Ademais, os martes e domingos só abrirá polas mañás. “A idea é que todos os coruñeses coñezan estas instalacións e que poidan facelo a través de visitas guiadas abertas a todo o público, xa que até agora estaban reservadas para profesionais”.

O alcalde destacou que esta iniciativa se suma á aposta do Goberno local pola recuperación do patrimonio da cidade e avanzou que se seguirán facendo investimentos nestas instalacións. Como adiantou, está a realizarse un estudo de accesibilidade e posta en valor da parte subterránea da Batería Este para a colocación, entre outros traballos, dun ascensor. Esta actuación sumaríase aos traballos de acondicionamento realizados até o momento que ascenden a 120.000 euros.