A Coruña organiza actividades infantís polo Día Mundial do Medio Ambiente

A Concellaría de Medio Ambiente desenvolverá entre hoxe e o vindeiro venres, 6 de xuño, as actividades que programou polo Día do Medio Ambiente -que se conmemora mañá, xoves día 5- e que se celebran na Casa da auga co obxectivo de inculcar aos máis pequenos sobre a importancia da sustentabilidade e da loita contra o cambio climático.

Cada 5 de xuño celébrase o Día Mundial do Medio Ambiente, auspiciado polo Programa das Nacións Unidas para o Medio Ambiente. Trátase da celebración máis importante das que ao longo do ano dedícanse á sustentabilidade. Todo tipo de institucións dedica ese día á difusión dunha nova conciencia planetaria e a facer visibles novos comportamentos que permitan ao planeta unha pervivencia en condicións adecuadas para todas as especies. O Concello da Coruña súmase a este día con accións pensadas sobre todo para os máis pequenos.

Un total de 300 alumnos achegaranse desde hoxe e até o vindeiro venres ás actividades proxectadas pola área que dirixe Enrique Salvador en Cásaa da auga. Son estudantes de 4º, 5º e 6º de Primaria, que participarán durante este tres días en grupos de 25 alumnos en horario de 09.30 a 13.30 horas. Tras o éxito alcanzado o ano pasado, a Concellaría de Medio Ambiente organiza dous tipos diferentes de actividades para concienciar aos máis pequenos sobre a necesidade de coidar a súa contorna natural:

– Coruña Sustentable! Os alumnos utilizan unha ortofoto xigante da cidade instalada no hall da Casa da auga. Os participantes divídense en tres grupos e a cada un formúlanselle preguntas relacionadas co interese ambiental en A Coruña. Cada pregunta que acerten vale un punto, e para gañar os puntos deberán buscar na foto aérea da Coruña a peza na que se atopa o lugar ao que se refire a pregunta e levarlla ao monitor. Logo, tras reflexionar con el acerca de en que consiste esa achega da cidade á sustentabilidade, deben volver colocar a súa peza correspondente no seu sitio.

– Representamos o Cambio Climático. Cada un dos participantes converterase nun elemento relacionado co cambio climático, como unha nube, unha cheminea, un automóbil, un farol ou un aeroxerador. Tras elixir cada un o seu, o colorean e, a continuación, dirixidos polo monitor, recrean as causas do cambio climático, coñecen os seus efectos e as solucións que se están expondo e adoptando para encarar este problema tanto a nivel global como desde a cidade da Coruña. Por último, explícaselles aos nenos o papel que cada persoa, pequenos e maiores, xoga para lograr un futuro climáticamente máis sustentable. Para a realización da actividade, os nenos contarán con paneis informativos e repartiranse folletos sobre a Estratexia Contra o Cambio Climático da Coruña.

A maiores, o Concello tamén dispón ao longo do ano dun completo programa de educación ambiental permanente no que cada ano participan preto de 7.000 nenos e nenas. Ademais, organízanse outras actividades para celebrar o compromiso da cidade co medio ambiente, como a Hora do Planeta e a Semana da Enerxía Sustentable. O departamento que dirixe Enrique Salvador defende que a educación é un dos alicerces básicos para que as accións ambientais que se promoven desde o Concello sexan eficaces. Dirixida aos veciños de todas as idades, de forma moi particular aos máis novos, a educación é o mellor instrumento para alcanzar unha sociedade participativa e dinámica na aposta pola constante mellora da calidade de vida no marco da sustentabilidade.