Un total de 22 desempregados participaron no obradoiro de atención sociosanitaria a dependentes en Cambre

Beatriz Mato na entrega de diplomas

Un total de 22 alumnos en situación de desemprego participaron no obradoiro de emprego de Cambre na especialidade de atención sociosanitaria a persoas dependentes.

A conselleira de Traballo e Benestar, Beatriz Mato, entregou hoxe os diplomas aos participantes desta iniciativa mixta de formación e emprego, na que o departamento autonómico investiu preto de 200.000 euros.

A titular de Traballo indicou que o obradoiro ofrece numerosas vantaxes. A primeira de todas elas, é que os alumnos poden acceder a un posto de traballo e, ao mesmo tempo, ofrécelles unha formación teórica e práctica de calidade. De feito, Mato lembrou que “os participantes obtiveron un certificado de profesionalidade, que acredita a súa cualificación, enriquece o seu currículo e mellora a súa empregabilidade”.

Ademais, este obradoiro permite “axudar de forma directa aos máis vulnerables” e constitúe “un importante xacemento de emprego de presente e futuro”, tal e como corroboran os datos de inserción laboral máis recentes, que reflicten que a inserción dos participantes nos cursos de atención sociosanitaria en institucións acadou o 52% en Galicia ou do anterior obradoiro celebrado en Cambre, que acadou unha inserción do 70%.

Mato salientou que este obradoiro é tamén un exemplo de cooperación entre concellos, pois agrupa os esforzos destes dous municipios o que permite acadar a “máxima eficacia e eficiencia dos investimentos públicos”.

A conselleira lembrou que o Goberno galego mantén unha firme aposta por estes programa mixtos de formación e emprego. Actualmente, hai en marcha en Galicia 50 obradoiros, grazas a un investimento de máis de 9,5 millóns de euros. Na provincia da Coruña, están funcionando un total de 17, con 370 alumnos, e un orzamento de 3,3 millóns de euros.