Termatalia e Ourense protagonizan o Simposio Internacional de Termalismo en Colombia

Presentación de Termatalia en Colombia

Termatalia e Ourense foron as protagonistas do 1º Simposio Internacional de Termalismo organizado esta semana en Bogotá polo Ministerio de Industria, Comercio e Turismo de Colombia e no que España (representada pola feira internacional e a capital termal) participou como país invitado. Tratouse dun acto paralelo e unha das principais novidades do Congreso Internacional de Estética organizado por APROFEST que celebrou a súa 13ª edición e ao que asistiron máis de 400 profesionais de varios países latinos.

Neste 1º Simposio, o director de Termatalia, Alejandro Rubín, impartiu unha conferencia sobre mercadotecnia termal que incluíu ademais a presentación da próxima edición da Feira Internacional de Turismo Termal que se celebrará en Termas de Río Fondo (Arxentina) do 2 ao 4 de outubro de 2014. Doutra banda, o concelleiro de Termalismo de Ourense e membro do comité asesor de Termatalia, José Ángel Vázquez Baquero, presentou a experiencia e traxectoria de Ourense como cidade termal, como capital termal española e como socio fundador da Asociación de Cidades Europeas con Patrimonio Histórico (EHTTA). Con máis de 4,5 millóns e medio de litros de auga mineromedicinal ao día, Ourense é a segunda cidade de Europa en potencial termal.

A representación española completouse coa participación da investigadora da Universidade de Vigo, Lourdes Mourelle, tamén membro do comité asesor de Termatalia como presidenta da Sociedade Galega de Talasoterapia (SOGAT). É autora de publicacións científicas relacionadas con “Cosmética termal”, “Técnicas hidrotermales e estética do benestar”.

Acordo de colaboración entre Ourense e Colombia

A celebración deste 1º Simposio Internacional de Termalismo comezou coa firma dun “Memorando de entendemento” entre o Ministerio de Comercio, Industria de Turismo de Colombia, representado polo xerente do Programa de Transformación Produtiva (PTP), Camilo Montes, e o Concello de Ourense, representado polo seu concelleiro de Termalismo, José Ángel Vázquez Barqueiro, para promover, fomentar e aumentar a colaboración entre ambas as institucións no sector do turismo e do benestar, principalmente, en termalismo.

Neste acordo establécese que as dúas entidades poderán cooperar para o desenvolvemento de procesos de investigación no sector do turismo de benestar, así como realizar misións empresariais para a xeración de contactos e vínculos comerciais. A cooperación mutua entre España e Colombia contempla ademais a organización de eventos especializados, dirixidos a empresarios que traballen en turismo de benestar, preferentemente en temas relacionados coa auga, como o termalismo.

O sector de Turismo de Benestar é un dos 20 sectores estratéxicos da economía colombiana que busca crecer e competir á vez que se consolida como motor da industria deste país. “Colombia ten moito por aprender da experiencia da capital termal de Ourense. Debemos aproveitar o potencial que temos en termalismo coas 320 fontes termais, para converter ao país nun gran exportador deste servizo que fai parte do Turismo de Benestar, non vendo as termais só de tipo recreativo, senón tamén desde o punto de vista de termalismo terapéutico con fins de exportación”, explicou Camilo Montes durante a firma do convenio.

Paquete profesional para asistir a Termatalia Arxentina

Este congreso complementouse cunha superficie expositiva na que Aviaexport e Corcientífica participaron cunha caseta promocional de Termatalia no que deron a coñecer o paquete especial creado por estas empresas para que os profesionais do sector de Colombia poidan asistir a Termatalia Arxentina o próximo mes de outubro.