Rey Varela anuncia a licitación das obras de recuperación dos Xardíns de Herrera e dos baixos da Costa de Mella

O alcalde de Ferrol, Jose Manuel Rey Varela; e o concelleiro de Urbanismo, Infraestruturas e Contratación, Guillermo Evia Pérez, informaron hoxe do inicio do procedemento de contratación das obras de reurbanización dos Xardíns de Herrera e rehabilitación dos baixos da Costas de Mella. A Xunta de Goberno Local deu hoxe luz verde a licitación do proxecto, que inclúe a mellora da comunicación e da accesibilidade do Paseo do Túnel. O orzamento base de licitación ascende a 1,3 millóns de euros e o prazo estimado de execución dos traballos é de 15 meses, contados a partir da firma do contrato e da acta de reformulo dos mesmos.

Rey Varela considerou esta intervención como “unha das máis ambiciosas das que temos propostas para renovación da cidade, tanto pola súa transcendencia en canto ao que suporá de mellora e recuperación dun entorno emblemático de Ferrol e dende o que se ten dúbida unha panorámica única da nosa ría e Arsenal, como pola súa contía económica”. O rexedor ferrolá lembrou que o pasado mes de abril o proxecto recibía a autorización da Dirección Xeral de Patrimonio da Xunta de Galicia, o que permite ao Goberno Municipal avanzar agora na licitación da actuación, que estará financiada nun 80% con fondos europeo do Programa Urban Ferrol. O 20% restante os achegarán as armas municipais.

Ademais, o primeiro edil da cidade explicou que a recuperación dos xardíns de Herrera e do entorno da Costa de Mella “é unha actuación estratéxica que permitirá mellorar a comunicación e a permeabilidade entre o conxunto histórico de A Magdalena e Ferrol Vello, tal e como se contempla no Plan Especial de Ferrol Vello”. Así mesmo, Rey Varela explicou que este proxecto tamén suporá “a mellora da competitividade do Parador de Turismo, que é un referente no ámbito turístico de Ferrol e comarca”.

Investimentos por 10 millóns de euros

Rey Varela referiuse ao nivel de actuacións en proxecto, licitación ou en execución que ten nestes momentos en marcha o Goberno Municipal e cuxo montante global ascende a 10 millóns de euros. Unha cifra que fai de Ferrol “unha das cidades do norte de España con maior investimento en mellora urbana; o que é posible cunha política económica rigorosa e estable que permite que as obras non queden soamente en proxectos senón que se podan licitar”. Ao respecto, o alcalde ferrolán fixo un repaso ás actuacións de mellora urbana previstas polo Executivo Local: rúa do Sol; Cantón de Molíns; rúa Alegre; Centro Cívico, para Persoas Maiores e Atención á Infancia de Canido; prazas Río do Tronco e de Sartaña; mellora da estrada O Pico-Leixa e das rúas Río Xuvia, Herbosa e Fontemoura; e o programa de grandes asfaltados e aglomerados para as zonas urbana e rural e que complementará o Plan de Barrios.

Mellores zonas axardinadas e ascensor panorámico

No que atinxe aos principais fitos das obras de recuperación dos Xardíns de Herrera e dos baixos da Costa de Mella, o alcalde apuntou que os traballos deixarán o 100% da zona axardinada para o disfrute da cidadanía; dispoñeranse tres itinerarios con lousa de pedra; e se recuperan as antigas escadas que comunicaban cos baixos de Mella e a praza do Carbón ademais de instalarse un ascensor panorámico. Ademais, os baixos da Costa de Mella rehabilitaranse para darlle uso de centro de interpretación da cidade histórica.

Pola súa parte, o titular de Urbanismo sinalou que a actuación estará completamente rematada ao longo do ano 2015; e recordou que ao principio do mandato “atopámonos co muro da Costa de Mella apuntalado e con parte da zona axardinada afundida”. O aspecto deste entorno privilexiado da cidade será moi distinto tralas obras que hoxe licitou o Goberno Municipal.