Os xardíns das praias da Concha e da Compostela contarán con novas papeleiras

Co cese das choivas, o Concello retoma os traballos de posta a punto das praias e zonas verdes do municipio co obxecto de que estean en perfecto estado de cara á temporada estival que é cando reciben maior número de usuarios. Neste marco, o servizo de Parques e Xardíns comezou esta mañá os traballos de dotación de novas papeleiras no Parque da Compostela e o xardín da Concha.

O material que se está instalando nos xardíns das praias de Vilagarcía foi fabricado polos alumnos do Obradoiro de Emprego Vista Alegre II que rematou o pasado mes de abril. Trátase de papeleiras de madeira que manteñen unha estética acorde co entorno natural no que se emprazan.

O concelleiro de Parques e Xardíns, tamén responsable de Limpeza, confía en que a dotación das novas papeleiras contribúan a manter un aspecto máis coidado e limpo das zonas verdes municipais xa que poñendo máis medios a disposición dos usuarios tamén se facilita o uso das mesmas.

Por outro lado, ante os últimos episodios vandálicos, Jesús Longa, reiterou o chamamento ao civismo e volveu a pregar a colaboración dos veciños tanto no coidado do mobiliario urbano como á hora de facilitar información que axude a identificar as persoas que provocan destrozos nos bens públicos para que o Concello poida denuncialos e esixir o pago dos arranxos.