Os querelantes contra o edil compostelán piden que o exxerente de Sermasa sexa chamado como testemuña

O matrimonio que presentou unha querela contra o exconcelleiro de Deportes de Santiago de Compostela, despois de que transcendese que Adrián Varela pediu o despedimento da muller do policía local – sindicalista da CIG-, reclama que o exxerente de Sermasa, Alberto Quintana Vilarelle, sexa chamado a declarar en “calidade de testemuña”.

Na querela criminal presentada por un posible delito de impedimento de exercicio de dereitos civís, recordan que, con motivo da apertura do sumario da ‘Operación Pokémon’, tiveron “coñecemento de determinado tipo de actuacións que, ao parecer, levou a cabo o querelado”. Estas actuacións, din, estaban “dirixidas a prexudicar, gravemente”, os seus intereses, “vulnerando os seus dereitos fundamentais”.

No escrito presentado nos xulgados de Santiago de Compostela, alúdese ás informacións que sinalan que Adrián Varela, “aproveitándose da súa condición de concelleiro de Deportes e as relacións coa empresa Sermasa”, concesionaria do Concello de Santiago e que pertence ao Grupo Vendex, realizou actuacións para que “procedese ao despedimento” da querelante “polo feito de que o seu cónxuxe é policía local (da CIG)”.

Tras aparecer nos medios de comunicación estas informacións, o propio concelleiro Adrián Varela recoñeceu publicamente as súas palabras, as cales atribuíu a un “calentón” do momento.

“INSISTIU EN OITO OCASIÓNS”

Ademais, a raíz de coñecerse esta parte do sumario da investigación que instrúe a xuíza Pilar de Lara, os querelantes “foron informados por quen foi xefe de servizo de Sermasa de que o querelado insistiulle nunhas oito ocasións pedíndolle explicacións de por que non se levara a cabo o despedimento”.

Así as cousas, os querelantes solicitan que se remita dende o xulgado de instrución número 1 de Lugo, a documentación onde aparecen relacionados os feitos nos que se reflictan actuacións ou decisións relativas a este asunto.

Así mesmo, a maiores de chamar a declarar a Adrián Varela -citado para o próximo 13 de xuño-, tamén reclaman que acuda, en calidade de testemuña, Alberto Quintana Vilarelle. Tamén solicitaron 3.000 euros de fianza ao querelado para garantir as responsabilidades civís que puidesen derivarse.

DIMISIÓN DO CONCELLEIRO

Adrián Varela foi imputado no marco da ‘Operación Pokémon’ en maio do pasado ano, tras o cal, pediu á xunta de goberno que autorizase o custo da súa defensa, solicitude que foi ratificada por ese órgano o 30 dese mesmo mes. Unha denuncia cidadá e a posterior instrución de dilixencias levou á imputación e procesamento, por un presunto delito de prevaricación, a todos os membros que votaron esa resolución, que sentaron no banco dos acusados o pasado 19 de maio.

Unha semana despois de que os concelleiros acudisen ao xulgado, Adrián Varela presentou a súa dimisión alegando “solidariedade” cos seus compañeiros procesados, ao tempo que motivou a súa decisión na “presión” á que estivo sometida a súa familia no último ano, dende que transcendeu a súa imputación e acudiu a declarar a Lugo ante a xuíza Pilar de Lara.

Con todo, o mesmo día en que presentou a dimisión ante o alcalde, Ángel Currás, Adrián Varela recibira outra citación, a cal transcendeu ao día seguinte. Aínda que o rexedor dixo que a descoñecía cando o exedil acudiu a presentarlle o seu cesamento, a voceiro do goberno local, María Pardo, afirmou que ela a coñecía dende o luns.

Neste caso, Adrián Varela foi chamado a declarar, o próximo 13 de xuño, en calidade de querelado por un presunto delito contra exercicio de dereitos cívicos cometido por funcionario público. A querela foi presentada a raíz das conversacións que aparecen no sumario da Pokémon relativa a que el pediu o despedimento da muller dun sindicalista do concello que traballaba para a empresa Sermasa, unha concesionaria do Concello pertencente ao Grupo Vendex e que está sendo investigada nesta operación.