Os clientes do CCA Ferrol-A Magdalena votan ao seu negocio favorito

Belén do Campo na presentación da campaña

A directora xeral de Comercio, Sol Vázquez Abeal, e a delegada da Xunta na Coruña, Belén do Campo, participaron esta mañá na presentación da iniciativa de dinamización comercial Centros Comerciais Abertos. Máis que comercio!, que se desenvolverá nos establecementos asociados ao centro comercial aberto Ferrol- A Magdalena durante este mes, e que busca impulsar as vendas do comercio de proximidade premiando a confianza dos seus clientes.

Vázquez Abeal resaltou que os clientes dos comercios asociados a este CCA recibirán durante todo maio un cupón por cada 5euros de compra, o que lles permitirá participar nun xogo en liña na web www.maisquecomercio.com. Neste, votando ao seu establecemento favorito optarán a un premio en metálico de 200 euros e outros dous de 100, ademais de participar no sorteo de diferentes agasallos achegados polo propio centro comercial aberto. Ao remate do mes, o establecemento seleccionado polos clientes que participen na mesma recibirá un recoñecemento público ao seu labor no impulso do comercio de proximidade.

Neste contexto, a directora xeral de Comercio resaltou as diferentes iniciativas activadas polo centro comercial aberto da Magdalena durante todo o ano, como a Fashion Night que hoxe mesmo se celebra, e cuxo programa detallaron os responsables do CCA.

A iniciativa da Xunta Máis que comercio! está a percorrer os diferentes centros comerciais abertos de Galicia durante todo o ano, resaltando os valores do comercio de proximidade como a calidade, o trato ao cliente, a diferenciación e a variedade. Ademais, pon de relevo o traballo que desenvolven os centros comerciais abertos, unha fórmula que permite o desenvolvemento de estratexias comerciais e a prestación de servizos de forma conxunta no pequeno comercio para mellorar a súa competitividade.