Os clientes de Bueu, Cangas e Moaña escolleno seu comercio favoritona campaña Máis que comercio!

A directora xeral de Comercio, Sol Vázquez Abeal, presentou hoxe na sede de Fecimo en Cangas a campaña de dinamización comercial Centros Comerciais Abertos. Máis que comercio!, que se desenvolverá en xuño nos centros comerciais abertos de Bueu, Cangas e Moaña, e que busca impulsar as vendas do comercio de proximidade premiando a confianza dos seus clientes.

As persoas que merquen nos comercios asociados a estes CCAs recibirán durante todo o mes un cupón por cada 5€ de compra, o que lles permitirá participar nun xogo en liña na web www.maisquecomercio.com. Nesta páxina, votando ao seu establecemento favorito, poderán optar a unha tarxeta regalo de 200 euros e dúas de 100 en cada CCA para mercar no comercio local, así como a diferentes agasallos, vales e descontos achegados polas asociacións e os comerciantes. Ao remate do mes, os establecementos seleccionado polos clientes que participen na iniciativa recibirán un recoñecemento público ao seu labor.

A iniciativa da Consellería de Economía e Industria Centros Comerciais Abertos. Máis que Comercio! percorre os diferentes centros comerciais abertos de Galicia durante todo o ano, celebrándose cada mes en cinco deles, co obxectivo de resaltar os valores do comercio de proximidade como a calidade, o trato ao cliente, a diferenciación e a variedade.

Ao mesmo tempo, destácase o traballo que desenvolven os CCAs, unha fórmula que permite, desde o asociacionismo, o desenvolvemento de estratexias comerciais e a prestación de servizos de forma conxunta no pequeno comercio para mellorar a súa competitividade.